বৰপেটাৰ হেলছা পামত নিজ পিতৃয়ে হত্যা কৰিলে দুবছৰীয়া কন্যাক
ৰাজ্যত হত্যা, হিংসা, ধৰ্ষণ আদিৰ নিচিনা অপৰাধজনিত ঘটনা ক্ৰমাৎ বৃদ্ধি পাই অহাৰ সময়তে আজি সংঘটিত এক অনুৰূপ ঘটনাই বৰপেটা জিলাক জোকাৰি যায়।
জিলাখনৰ সৰ্থেবাৰীৰ সমীপৰ হেলছা পামত নিজ পিতৃৰ হাততে দুবছৰীয়া কন্যাই প্ৰাণ হেৰুৱাব লগীয়া ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে।
প্ৰাপ্ত তথ্য মতে হেলছা পাম নিৱাসী ছহিদুল ইছলাম নামৰ লোকজনে নিজৰে দুবছৰীয়া কন্যা সন্তানক হত্যা কৰি ঘৰৰ ভিতৰত কাপোৰেৰে ঢাকি ৰাখে। পিছত পৰিয়ালৰ অইন লোকে মৃতদেহটো প্ৰত্যক্ষ কৰাৰ লগে লগে ঘৰখনৰ লগতে অঞ্চলটোত হুৱাদুৱা লাগে।
পিছত স্থানীয় ৰাইজে ঘটনা সন্দৰ্ভত আৰক্ষীক খবৰ দিয়াত আৰক্ষীয়ে ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বৰপেটা চিকিৎসা মহাবিদ্যালয়লৈ প্ৰেৰণ কৰে।
আনহাতে, হত্যাকাৰী পিতৃ ছহিদুল ইছলাম সম্প্ৰতি পলাতক অৱস্থাত আছে বুলি জানিব পৰা গৈছে ৷ কি কাৰণত ছহিদুল ইছলামে নিজৰ দুবছৰীয়া কন্যাক হত্যা কৰিলে সেয়া বাতৰি লিখা পৰলৈকে জানিব পৰা হোৱা নাই।