নিজ হাতেৰে ডাঙৰ কৰা পুত্ৰৰ অমানৱীয় হত্যাক সহ্য কৰা নহ’ব : নিহত আলফা সদস্য ৰুবুলৰ পিতৃৰ পৰেশ বৰুৱাক স্থিতি স্পষ্ট কৰাৰ আহ্বান

আলফা (স্বা)ৰ শিবিৰ এৰি পলায়ন কৰাৰ বাবে ললিত অসম, অশ্চিনী অসম আৰু ৰুবুল মৰাণক সংগঠনটোৱে হত্যা কৰা বুলি বাতৰি ওলোৱাৰ পিছতে ৰুবুল মাৰণ ওৰফে ৰাইনো অসমৰ পৰিয়ালৰ লোকেও ৰুবুলক হত্যা কৰাৰ অভিযোগ উত্থাপন কৰি পৰেশ বৰুৱাক এই সম্পৰ্কত স্থিতি স্পষ্ট কৰিবলৈ আহ্বান জনায়।

উল্লেখযোগ্য যে ২৩ এপ্ৰিলত অৰুণাচলত গ্ৰেপ্তাৰ হোৱা আলফা (স্বা)ৰ সদস্য মৃদুল মহন্ত ওৰফে নিবিড় অসমে আৰক্ষীৰ আগত ললিত অসম, অশ্চিনী অসম আৰু ৰুবুল মৰাণক আলফা(স্বা) ৰ পৰা পলায়নৰ চেষ্টা কৰোতে হত্যা কৰা হয় বুলি স্বীকাৰোক্তি প্ৰদান কৰিছিল।

ইয়াৰ পিছতে চিন্তিত হৈ পৰা ৰুবুল মৰাণৰ পৰিয়ালবৰ্গই সংবাদ মাধ্যমৰ আগত ক্ষোভেৰে দাবী কৰি কয় যে আলফা (স্বা)ৰ মুখ্য সেনাধ্যক্ষ পৰেশ বৰুৱাই এই সম্পৰ্কে স্থিতি স্পষ্ট কৰা উচিত।

কাকপথাৰৰ সৰুমেচাই গাঁৱৰ ৰুবুল মৰাণ নামৰ যুৱকজনে তিনিবছৰৰ আগতেই যোগদান কৰিছিল আলফা (স্বা)ত। ৰুবুলৰ পিতৃ বাবুল মৰাণে কয় যে নিজ হাতেৰে ডাঙৰ-দীঘল কৰা পুত্ৰৰ এনে অমানৱীয় হত্যা কেতিয়াও সহ্য কৰা নহ’ব। লগতে কাকপথাৰৰ সচেতন মহলেও এই সমগ্ৰ বিষয়টোৰ স্থিতি স্পষ্ট কৰিবলৈ পৰেশ বৰুৱাক আহ্বান জনাইছে।