গুৱাহাটী বিমান বন্দৰত ৮০ উৰ্দ্ধৰ মহিলাক ষ্টীপ-চাৰ্চ কৰা CISF কনিষ্টবলক নিলম্বন
গুৱাহাটী আন্তঃৰাষ্ট্ৰীয় বিমানবন্দৰত এগৰাকী বিশেষভাৱে সক্ষম ৮০ বছৰীয়া মহিলাক ষ্ট্ৰিপ-চাৰ্চ কৰা এগৰাকী কেন্দ্ৰীয় ঔদ্যোগিক সুৰক্ষা বাহিনী (CISF)ৰ মহিলা কনিষ্টবলক নিলম্বন কৰা হৈছে।
CISF ৰ শীৰ্ষ বিষয়-ববীয়াই জানিবলৈ দিয়া মতে, বৃদ্ধাগৰাকীক তালাচীৰ নামত উলংগ হ’বলৈ বাধ্য কৰা মহিলা কনিষ্টবলগৰাকীক নিলম্বন কৰা হৈছে। লগতে উক্ত ঘটনাটোৰ তদন্ত চলি আছে বুলিও CISFৰ বিষয়া গৰাকীয়ে জানিবলৈ দিয়ে।
উল্লেখ্য যে বৃহস্পতিবাৰে গুৱাহাটী বিমানবন্দৰত বিশেষভাৱে সক্ষম নগা মহিলাগৰাকীক তালাচী চলোৱাৰ নামত শৰীৰৰ সকলো কাপোৰ খুলিবলৈ বাধ্য কৰোৱাৰ অভিযোগ উত্থাপিত হৈছিল।
দিল্লী ভ্ৰমণৰ উদ্দেশ্যে যোৱা মহিলাগৰাকী তেওঁৰ নাতিসহ গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত নিৰাপত্তা পৰীক্ষাৰ সময়ত এই চাঞ্চল্যকৰ ঘটনা সংঘটিত হৈছিল।
মালো কিকন নামৰ এই মহিলাগৰাকীৰ জীয়ৰী তথা নাগালেণ্ডৰ এগৰাকী প্ৰখ্যাত নৃতত্ত্ববিদ ডলী কিকনে কেইবাটাও টুইটযোগে গুৱাহাটী বিমানবন্দৰত তেওঁৰ বিকলাঙ্গ মাতৃয়ে সন্মুখীন হোৱা এনে অভাৱনীয় পৰিস্থিতিৰ বিষয়ে ৰাজহুৱা কৰিছিল।
সামাজিক মাধ্যমত ডলী কিকনে এনেদৰে ক্ষোভ প্ৰকাশ কৰাৰ পিছতে গুৱাহাটী আন্তঃৰাষ্ট্ৰীয় বিমানবন্দৰে ডলী কিকনৰ ওচৰত ক্ষমা বিচাৰে।