যোৱা তিনিদিনত পোন্ধৰজন উগ্ৰপন্থীক গ্ৰেপ্তাৰ কৰা হৈছে : জনাইছে মণিপুৰ আৰক্ষীয়ে
মণিপুৰ আৰক্ষীয়ে জনোৱা মতে, ৰাজ্যৰ কেইবাখনো জিলাত অভিযান চলাই থকা নিৰাপত্তা বাহিনীয়ে বিগত তিনিদিনত প্ৰায় পোন্ধৰ জন উগ্ৰপন্থীক গ্ৰেপ্তাৰ কৰিছে।
আৰক্ষীৰ মতে, ধৃত উগ্ৰপন্থীৰ ভিতৰত আছে চিন কুকি মিজো সেনাৰ ‘কমাণ্ডাৰ ইন চিফ’।
মণিপুৰ আৰক্ষীয়ে কয়, “চুৰাচান্দপুৰ জিলাৰ পৰা চিকেএমএৰ স্বঘোষিত মুখ্য সেনাধ্যক্ষ পাওখোলেন গুইটেক নিৰাপত্তা বাহিনীয়ে গ্ৰেপ্তাৰ কৰিছে।”
কেন্দ্ৰীয় চৰকাৰ আৰু কুকি উগ্ৰপন্থী সংগঠনৰ ২৫টা গোটৰ মাজত চুক্তি স্বাক্ষৰিত হোৱা বুলিও জনাইছে আৰক্ষীয়ে ।
এই উগ্ৰপন্থীসকলৰ পৰা নিৰাপত্তা বাহিনীয়ে দুটা এ কে ৪৭ ৰাইফল, দুটা এ কে ৪৭ মেগজিন, বহু সংখ্যক গুলী, আৰু এক লাখৰো অধিক নগদ ধন উদ্ধাৰ কৰিছে।
মণিপুৰৰ সামৰিক অভিযানৰ সৈতে জড়িত এজন বিষয়াই উল্লেখ কৰিছে যে যোৱা মাহৰ পৰা ৰাজ্যখনত উগ্ৰপন্থীৰ বিৰুদ্ধে কঠোৰ অভিযান চলি আছে।
যোৱা তিনিদিনত গ্ৰেপ্তাৰ হোৱা উগ্ৰপন্থীসকল তিনিটা নিষিদ্ধ সশস্ত্ৰ গোটৰ সৈতে জড়িত বুলি কোৱা হৈছে। সেইকেইটা হৈছে – চিকেএমএ, চিন কুকি মিজো আৰ্মি, ইউনাইটেড কুকি নেচনেল আৰ্মি (ইউকেএনএ), আৰু মেইটেই পিপলছ লিবাৰেচন আৰ্মি (পিএলএ)।
ইয়াৰ পূৰ্বে ১ অক্টোবৰত চুৰাচান্দপুৰ জিলাত চি কে এম এৰ চাৰিজন কেডাৰক গ্ৰেপ্তাৰ কৰা হৈছিল।
বৃহস্পতিবাৰে এক সুকীয়া অভিযানত নিৰাপত্তা বাহিনীয়ে ইম্ফল পশ্চিম জিলাৰ পৰা পিএলএৰ দুজন কেডাৰক গ্ৰেপ্তাৰ কৰে।