হতাশ অনুৰাগী! ‘বিৰাট’ যুগৰ অৱসান; টেষ্ট ক্ৰিকেটৰ পৰা অৱসৰ ‘কিং’ কোহলীৰ

ৰঙা বলৰ ক্ৰিকেটত তেওঁক পুনৰ দেখা যাব নে নাই তাকলৈ জল্পনা-কল্পনা বাঢ়ি আহিছিল। অনুৰাগীৰ প্ৰাৰ্থনা, ব’ৰ্ডৰ কৰ্মকৰ্তাসকলৰ অনুৰোধ একোৱেই কামত নাহিল। ভাৰতীয় তাৰকা ক্ৰিকেটাৰ বিৰাট কোহলীয়ে টেষ্ট ক্ৰিকেটৰ পৰা অৱসৰ গ্ৰহণ কৰিলে। সোমবাৰে তেওঁ নিজৰ ইনষ্টাগ্ৰাম পোষ্টত এই কথা ঘোষণা কৰে।

কোহলীয়ে লিখিছে, ‘টেষ্ট ক্ৰিকেটত ব্যাগী ব্লু জাৰ্চি পিন্ধা আজি ১৪ বছৰ হ’ল। সঁচা কথা ক’বলৈ গ’লে এই ফৰ্মেটে মোক ইমান দূৰলৈ লৈ যাব বুলি মই কেতিয়াও কল্পনা কৰা নাছিলো। টেষ্ট ক্ৰিকেটে মোক প্ৰস্তুত কৰিছে। ক্ৰিকেটৰ এই দীঘলীয়া ফৰ্মেটটোৱে মোক যি শিক্ষা দিছে, সেয়া আজীৱন পাথেয়।‘

কোহলীয়ে লগতে লিখিছে, ‘এই ফৰ্মেটৰ পৰা আঁতৰি যোৱাটো সহজ নাছিল। কিন্তু এনে লাগে যেন এইটোৱেই আদৰ্শ সময়। টেষ্ট ক্ৰিকেটক যিমানখিনি দিছো তাতকৈ বহু বেছি উভতাই পাইছো। মই কৃতজ্ঞ। কিন্তু যাবই লাগিব। মই সদায় হাঁহিমুখে মোৰ টেষ্ট কেৰিয়াৰলৈ উভতি চাম।’

আন্তঃৰাষ্ট্ৰীয় টেষ্ট ক্ৰিকেটৰ পৰা তেওঁৰ অৱসৰ লোৱাৰ লগে লগে ‘বিৰাট যুগ’ৰ অন্ত পৰিল। ২০২৪ চনত টি-২০ বিশ্বকাপ জয় কৰাৰ পাছত ইতিমধ্যে ক্ৰিকেটৰ এই চুটি ফৰ্মেটৰ পৰা অৱসৰ গ্ৰহণ কৰিছিল ‘কিং’ কোহলীয়ে ।

ইতিমধ্যে জল্পনা-কল্পনাৰ সৃষ্টি হৈছিল। খবৰ অনুসৰি অষ্ট্ৰেলিয়াত অনুষ্ঠিত বৰ্ডাৰ-গাভাস্কাৰ ট্ৰফীৰ সময়ত কোহলীয়ে কেইবাবাৰো সতীৰ্থসকলক সোঁৱৰাই দিছিল যে তেওঁৰ টেষ্ট কেৰিয়াৰ অতি সোনকালে শেষ হ’ব। সেই সময়ত প্ৰায় কোনেও গুৰুত্ব দিয়া নাছিল। বহুতে ভাবিছিল যে তেওঁ হয়তো ধেমালি কৰিছে।

শেহতীয়াকৈ ৰোহিত শৰ্মাই অৱসৰ লোৱাৰ পিছত কোৱা হৈছিল যে কোহলীয়েও দীঘলীয়া ফৰ্মেটৰ পৰা অৱসৰ লোৱাৰ সিদ্ধান্ত বিচিচিআইক অৱগত কৰিছে। অৱশ্যে ইংলেণ্ড ভ্ৰমণৰ গুৰুত্ব বুজি ব’ৰ্ডে তেওঁক এই সিদ্ধান্ত পুনৰ বিবেচনা কৰিবলৈ অনুৰোধ জনায়। কিন্তু ব’ৰ্ডৰ অনুৰোধত কোহলীয়ে সিদ্ধান্ত ভংগ নকৰিলে। নিজৰ সিদ্ধান্তত দৃঢ়তাৰে থিয় দি তেওঁ টেষ্ট ক্ৰিকেটৰ পৰা অৱসৰ লোৱাৰ কথা ঘোষণা কৰে।

শেহতীয়াকৈ বিৰাটে ভাৰতীয় জাৰ্চি পিন্ধি খেলা চেম্পিয়নছ ট্ৰফীত টীম ইণ্ডিয়া  জয়ী হৈছে। আই পি এলতো তেওঁ দুৰ্দান্ত ফৰ্মত আছে। ইমান দুৰন্ত ফৰ্মৰ মাজতো বিৰাটে টেষ্ট ক্ৰিকেটৰ পৰা অৱসৰ লোৱাৰ সিদ্ধান্তত অনুৰাগীসকল হতাশ হৈ পৰিছে। ইংলেণ্ড শৃংখলাৰ পূৰ্বে এই সিদ্ধান্ত লোৱাৰ বাবে ভাৰতীয় দলত চাপ বাঢ়িল।

কোহলীয়ে নিজৰ বৰ্ণিল টেষ্ট কেৰিয়াৰত ১২৩খন মেচ খেলি ৯২৩০ ৰান সংগ্ৰহ কৰে। গড় ৪৬.৮৫। বিৰাটৰ নামত ৩০ টা শতক আৰু ৩১টা অৰ্ধশতক আছে।