শিৱসাগৰ পৌৰসভাত বিত্তীয় অনিয়ম: দৰমহাত খৰচ হ’ল ত্ৰয়োদশ বিত্তীয় আয়োগে চহৰ উন্নয়নৰ বাবে দিয়া ধন

পোহৰলৈ আহিছে ঐতিহাহিক শিৱসাগৰ চহৰৰ পৌৰ সভাৰ কাৰ্যালয়ত চৰকাৰী পুঁজিৰ লাখ লাখ টকা অপব্যৱহাৰৰ ঘটনা। কেগৰ প্ৰতিবেদনে ফাদিল কৰিছে চৰকাৰী পুঁজি অপব্যৱহাৰৰ তথ্য।

এজাক বৰষুণতেই কৃত্ৰিম বানৰ সৃষ্টি হোৱা, চহৰৰ চাৰিওফালে দূৰ্গন্ধময় পৰিৱেশে বিৰাজ কৰা, নলা নৰ্দমা সময়মতে পৰিস্কাৰ নকৰা আদিকে ধৰি এশ একুৰি সমস্যাৰ বাবে সততে শীৰ্ষত থকা শিৱসাগৰ পৌৰ সভাৰ বিৰুদ্ধে এইবাৰ নগৰ উন্নয়নৰ বাবে অহা পুঁজি অপব্যৱহাৰ কৰাৰ তথ্য পোহৰলৈ আহিছে।

ত্ৰয়োদশ বিত্তীয় আয়োগে শিৱসাগৰ চহৰ উন্নয়নৰ বাবে দিয়া ১ কোটি ৬৪ লাখ টকা শিৱসাগৰ চহৰৰ উন্নয়নৰ নামত নখটোৱাই কৰ্মচাৰী, পৌৰপতি তথা ৱাৰ্ড সদস্যৰ দৰমহাৰ বাবদ খৰচ কৰাৰ তথ্য পোহৰলৈ আহাত সৰ্বতে প্ৰতিক্ৰিয়াৰ সৃষ্টি হৈছে।

আৰটিআই কৰ্মী দিগন্ত শইকীয়াই শিৱসাগৰ পৌৰ সভাত সংঘটিত চৰকাৰী পুঁজিৰ অপব্যৱহাৰৰ কেলেংকাৰীৰ এক উচ্চ পৰ্যায়ৰ তদন্ত দাবী কৰাৰ লগতে পৰৱৰ্তী সময়ত তেওঁ গুৱাহাটী হাই কৰ্টত পিআইএল দাখিল কৰিব বুলি প্ৰকাশ কৰে।

দূৰ্নীতিৰ বিৰুদ্ধে মাতমাতি যোৱা শিৱসাগৰৰ বিধায়ক অখিল গগৈক এই বিত্তীয় কেলেংকাৰীৰ সম্পৰ্কত বিহিত ব্যৱস্থা ল’বলৈ তেওঁ দাবী জনায়।

শিৱসাগৰ চহৰ উন্নয়নৰ নামত অহা এই ধন শিৱসাগৰ পৌৰ সভাই চহৰখনৰ উন্নয়নত ব্যৱহাৰ নকৰি কৰ্মচাৰীৰ দৰমহাৰ নামত ব্যৱহাৰ কৰি শিৱসাগৰ চহৰবাসীক দীৰ্ঘদিনে যি নৰক যন্ত্ৰনা দিলে, এই সম্পৰ্কত বৰ্তমানৰ চৰকাৰ আৰু শিৱসাগৰ সমষ্টিৰ বিধায়ক অখিল গগৈয়ে কি ব্যৱস্থা গ্ৰহণ কৰিব সেয়া লক্ষ্যণীয় হ’ব।