মিঞা কবিৰ বিৰুদ্ধে পানবজাৰ আৰক্ষী থানাত গোচৰ
ৰাজ্যত নতুনকৈ প্ৰচাৰ আৰম্ভ হোৱা মিঞা কবিতাৰ জৰিয়তে এটা চক্ৰই ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত অসমৰ সামগ্ৰিক পৰিস্থিতিৰ বিষয়ে অপপ্ৰচাৰ চলোৱা বুলি অভিযোগ উত্থাপন কৰি প্ৰণৱজিৎ দ’লৈ নামৰ এগৰাকী ব্যক্তিয়ে পাণবজাৰ আৰক্ষী থানাত মিঞা কবিতাৰ ক্ষেত্ৰত উদ্যোগ গ্ৰহণ কৰি থকা কেইগৰাকীমান ব্যক্তিৰ বিৰুদ্ধে অভিযোগ দাখিল কৰিছে।
পানবজাৰ থানাত মিঞা কবিতাৰ লেখক হাফিজ আহমেদৰ লগতে ছুলতানা, আব্দুৰ ৰহিম, আশ্ৰাফুল হুছেইন, আব্দুল কালাম আজাদ, কাজি নীল, ছেলিম এম হুছেইন, কৰিশ্মা হাজৰিকা, বৰ্ণমালিকা চৌধুৰী আৰু ফৰহাদ ভূঞাৰ বিৰুদ্ধে গোচৰ ৰুজু কৰে প্ৰণৱজ্যিৎ দ’লৈয়ে।
অভিযোগকাৰী দ’লৈ উল্লেখ কৰা অনুসৰি, এটা কবিতাত মিঞা কবিতা প্ৰচাৰ কৰি থকা সকলে ৰাজ্যত চলি থকা ৰাষ্ট্ৰীয় নাগৰিকপঞ্জীৰ বিষয়ে উল্লেখ কৰি আপত্তি দৰ্শাই কবিতাটোত এন আৰ চিৰ নম্বৰ ব্যৱহাৰ কৰিছিল।
দ’লৈৰ মতে উচ্চতম ন্যায়ালয়ৰ নিৰ্দেশত অসমত সমগ্ৰ এন আৰ চি উন্নীতকৰণৰ প্ৰক্ৰিয়া চলি আছে গতিকে সমগ্ৰ প্ৰক্ৰিয়াটো সম্পূৰ্ণ নোহোৱাকৈ এই নম্বৰ কবিতাটোত ব্যৱহাৰ কৰাটো আদালতক অৱমাননা কৰা হৈছে।
উল্লেখযোগ্য যে, সম্প্ৰতি ৰাজ্যত মিঞা কবিতাৰ জৰিয়তে কিছুমান লোকে আন্তঃৰাষ্ট্ৰীয় সাংবাদ মাধ্যমত অসমৰ এন আৰ চি সম্বন্ধে ভুল বাখ্যা আগবঢ়োৱা বুলি ৰাজ্যখনৰ কিছু সচেতন লোকে মন্তব্য আগবঢ়াইছে।