মাতাল অৱস্থাত পত্নী, পুত্ৰক মাৰপিট; গ্ৰেপ্তাৰ হোৱাৰ পথত প্ৰাক্তন ক্ৰিকেটাৰ বিনোদ কাম্বলি!

পুনৰ বিতৰ্কত জড়িত হৈ পৰিছে ভাৰতীয় ক্ৰিকেট দলৰ প্ৰাক্তন ক্ৰিকেটাৰ বিনোদ কাম্বলি। শচীন তেণ্ডুলকাৰৰ শৈশৱৰ বন্ধু কাম্বলিৰ বিৰুদ্ধে এইবাৰ তেওঁৰ পত্নীক নিৰ্যাতনৰ অভিযোগ উত্থাপিত হৈছে। তেওঁৰ পত্নীয়ে মাৰপিট, নিৰ্যাতন আৰু উৎপীড়নৰ অভিযোগ তুলি আৰক্ষীৰ ওচৰত অভিযোগ দাখিল কৰিছে।

কিছুদিন পূৰ্বে কাম্বই চাকৰি বিচাৰি চৰ্চালৈ আহিছিল। তেওঁ পুনৰ এইবাৰ শিৰোনামলৈ ঘূৰি আহিল। প্ৰাক্তন ক্ৰিকেটাৰজনৰ বিৰুদ্ধে ঘৰুৱা হিংসাৰ অভিযোগ আছে। প্ৰাক্তন ক্ৰিকেটাৰজনৰ বিৰুদ্ধে মাতাল অৱস্থাত তেওঁৰ পত্নীক বাৰে বাৰে মাৰপিট, গালি-গালাজ আৰু হাৰাশাস্তি কৰাৰ অভিযোগ উত্থাপিত হৈছে।

কাম্বলিৰ পত্নীয়ে তেওঁৰ বিৰুদ্ধে বান্দ্ৰা আৰক্ষী থানাত এজাহাৰ দাখিল কৰিছে। তেওঁৰ বিৰুদ্ধে ভাৰতীয় দণ্ডবিধিৰ ধাৰা ৩২৪ (স্বেচ্ছাই বিপদজনক অস্ত্ৰৰে আঘাত কৰা) আৰু ৫০৪ (অপমান কৰা)ৰ অধীনত এটা গোচৰ ৰুজু কৰা হৈছে।

কাম্বলিৰ পত্নী এণ্ড্ৰিয়াই আৰক্ষীক কৈছে যে কাম্বলিয়ে মাতাল অৱস্থাত তেওঁৰ মূৰত ৰন্ধনৰ বাচনৰ হেণ্ডেলেৰে আঘাত কৰিছিল। ফলস্বৰূপে মূৰত তেওঁ গুৰুতৰ আঘাত পাইছে। এণ্ড্ৰিয়াই সমস্যাটোৰ সমাধান বিচাৰি আৰক্ষীৰ কাষ চাপিছে।

ঘটনাটো শনিবাৰে পুৱা ১ বজাৰ পৰা ১:৩০ বজাৰ ভিতৰত সংঘটিত হৈছিল। মাতাল অৱস্থাত নিশা ঘৰলৈ উভতি অহাৰ বিষয়ে কাম্বলিয়ে তেওঁৰ পত্নীৰ সৈতে তৰ্কত লিপ্ত হৈছিল। তাৰ পিছত তেওঁ তেওঁৰ পত্নীক প্ৰহাৰ তথা নিৰ্যাতন কৰিছিল।

তেওঁলোকৰ ১২ বছৰীয়া পুত্ৰ ঘটনাটোৰ একমাত্ৰ সাক্ষী। পুত্ৰই কাম্বলিক শান্ত কৰিবলৈ চেষ্টা কৰিছিল যদিও কোনো লাভ হোৱা নাছিল। কাম্বলিয়ে পাকঘৰলৈ গৈ এটা ফ্ৰাইং পেন আনি পত্নীৰ মূৰলৈ মাৰি পঠিয়াইছিল।

কাম্বলিৰ পত্নীয়ে আৰক্ষীক জনাইছে, “মই আৰু মোৰ পুত্ৰই তেওঁক শান্ত কৰিবলৈ চেষ্টা কৰাৰ পিছতো সফল হোৱা নাছিলো। কোনো কাৰণ নোহোৱাকৈ আমাক দুয়োজনকে অকথ্য গালি-গালাজ কৰিবলৈ আৰম্ভ কৰে। তেওঁক আমাক মাৰিবলৈ আৰম্ভ কৰে। তেওঁ পাকঘৰৰ পৰা এটা ফ্ৰাইং পেন লৈ মোৰ ফালে দলিয়াই দিয়ে। তাৰপিছতো বন্ধ হোৱা নাছিল। তেওঁক আমাক ক্ৰিকেট বেটেৰেও প্ৰহাৰ কৰে। কোনোমতে তেওঁক বাধা দি পুত্ৰৰ সৈতে ঘৰৰ পৰা ওলাই আহিছো।”