ডিব্ৰুগড়ত উপস্থিত প্ৰথমখন শ্ৰমিক স্পেচিয়েল ৰেল

ডিব্ৰুগড়ত প্ৰথমখন শ্ৰমিক স্পেচিয়েল ৰেল দেওবাৰে আহি উপস্থিত হৈছে।

কইম্বাটোৰৰ পৰা ডিব্ৰুগড়লৈ অহা ৰেলখনে তামিল নাডুত আবদ্ধ হৈ থকা ২৪৮ গৰাকী লোকক কঢ়িয়াই আনিছে।

ৰেলখন আহি বাণীপুৰ ষ্টেচনত উপস্থিত হোৱাৰ পিছতে স্বাস্থ্য বিভাগে যাত্ৰীসকলৰ স্ক্ৰীনিং কৰোৱায়।

আনহাতে শ্ৰমিক স্পেচিয়েল ৰেলৰ যোগেদি শনিবাৰে গুৱাহাটীত উপস্থিত হোৱা ডিব্ৰুগড় আৰু তিনিচুকীয়াৰ যাত্ৰীসকলক বাছেৰে জিলা দুখনলৈ লৈ অহা হয়।

পাঁচখন বাছেৰে কঢ়িয়াই অনা যাত্ৰীসকলৰ স্ক্ৰীনিঙৰ পিছত সাতজন যাত্ৰীক ডিব্ৰুগড়ৰ কুৱাৰেণ্টিন কেন্দ্ৰলৈ পঠোৱা হয়।

তিনিচুকীয়াৰ যাত্ৰীসকলক স্ক্ৰীনিঙৰ বাবে জিলাখনলৈ প্ৰেৰণ কৰা হয়।

ইফালে দেওবাৰে পুৱাই নতুন দিল্লীৰ পৰা চতুৰ্থখন স্পেচিয়েল ৰেলো আহি ডিব্ৰুগড়ৰ বাণীপুৰ ষ্টেচনত উপস্থিত হয়।

ৰেলখনে উজনি অসম আৰু অৰুণাচল প্ৰদেশৰ ২০৭ গৰাকী যাত্ৰীক কঢ়িয়াই আনিছিল।

ৰেলসমূহ আহি পোৱাৰ সময়ত ডিব্ৰুগড়ৰ উপায়ুক্ত পল্লৱ গোপাল ঝা আৰু আৰক্ষী অধীক্ষক শ্ৰীজিথ টি ৰেল ষ্টেচনত উপস্থিত থাকে।

“সকলো সংশ্লিষ্ট বিভাগৰ পৰা আমি সকলো সহায় পাইছো। ৰেলসমূহৰ ঠিকমতে আহি পোৱাৰ ক্ষেত্ৰত সকলো বিভাগে ঘনিষ্ঠ সমন্বয়েৰে কাম কৰিছে। অহা দিনকেইটাত আৰু অধিক যাত্ৰী ডিব্ৰুগড়ত উপস্থিত হ’ব,” উপায়ুক্ত ঝাই কয়।

লকডাউনত দেশৰ বিভিন্ন ঠাইত আবদ্ধ শ্ৰমিক, শিক্ষাৰ্থী, তীৰ্থযাত্ৰী, পৰ্য্যটককে ধৰি লোকসকলক কঢ়িয়াই অনাৰ বাবে ভাৰতীয় ৰেলৱেই এই শ্ৰমিক স্পেচিয়েল ৰেলসমূহ মুকলি কৰিছে।