ল’কডাউনৰ সময়ত বৃহৎ ক্ষতিৰ সন্মুখীন মীনপালক সকল; প্ৰয়োজনীয় ঔষধ আৰু খাদ্যৰ যোগান ব্যাহতৰ অভিযোগ 

ক’ৰ’না ভাইৰাছৰ সংক্ৰমণ প্ৰতিৰোধৰ বাবে দেশব্যাপী ল’কডাউন অব্যাহত থকাৰ ফলত বিভিন্ন ক্ষেত্ৰত বিৰূপ প্ৰভাৱ পৰা পৰিলক্ষিত হৈছে।

ৰাজ্য খনৰ দুগ্ধ ব্যৱসায়ী, গো-পালক, ক্ষুদ্ৰ চাহ খেতিয়ক সকলকে ধৰি বিভিন্ন ক্ষেত্ৰৰ সৈতে জড়িত লোকসকল বৃহৎ লোকচানৰ সন্মুখীন হৈছে।

অনুৰূপ ধৰণে বৃহৎ ক্ষতিৰ সন্মুখীন হৈছে ৰাজ্যৰ মীন পালক সকলো।

যোৰহাট জিলাৰ  টীয়কৰ বামুণপুখুৰী স্থিত উজনি অসমৰ সৰ্ববৃহৎ মাছ পোনা প্ৰজনন প্ৰকল্পৰ স্বত্বাধিকাৰী ৰাষ্ট্ৰীয় সন্মানপ্ৰাপ্ত মৎস্য পালক কমলা গগৈয়ে উৎপাদিত মাছৰ পোনা সমূহ বিক্ৰী কৰিব নোৱাৰাৰ ফলত বৃহৎ লোকচানৰ সন্মুখীন হৈছে বুলি মন্তব্য কৰিছে।

তদুপৰি, ল’কডাউনৰ সময়চোৱাত যাতায়ত ব্যৱস্থা সুচল নোহোৱাৰ বাবে মীন মহলত উৎপাদিত মাছৰ বিক্ৰী স্থবিৰ হৈ পৰাত মাছৰ আকাৰ ডাঙৰ হৈ মাছ সমূহ ৰাখিবলৈ অসুবিধাৰ সৃষ্টি হৈছে।

আটাইতকৈ লক্ষণীয় বিষয়টো হ’ল মাছ পালনৰ সময়ত  মাছৰ বাবে প্ৰয়োজনীয় ঔষধ আহে বহিঃ ৰাজ্যৰ পৰা, সাম্প্ৰতিক পৰিস্থিতিৰ বাবে এই ঔষধৰ যোগান ব্যাহত হৈ পৰাত মীনপালক সকল চিন্তিত হৈ পৰিছে।

ঔষধৰ নাটনিয়ে ৰাজ্যৰ মীন ক্ষেত্ৰখনলৈ অশনি সংকেত কঢ়িয়াই অনাৰ লগতে মাছৰ বাবে প্ৰয়োজনীয় খাদ্য যোগান ধৰাতো ব্যৰ্থ হৈছে চৰকাৰ প্ৰশাসন।

এনে বিপৰ্যয়ৰ সময়ত চৰকাৰে এইসকল মীন পালকৰ ক্ষেত্ৰত যদি কোনো পদক্ষেপ গ্ৰহণ নকৰে তেন্তে মীনপালক সকলৰ জীৱনলৈ অমানিশা নামি অহাটো নিশ্চিত।

সেয়ে এই সমগ্ৰ মীন পালনৰ ক্ষেত্ৰখনলৈ চৰকাৰৰ প্ৰয়োজনীয় সাহয্য বিচাৰিছে বিশিষ্ট মৎস্য পালক গৰাকীৰ লগতে অনান্য মৎস্য পালক সকলে l