ক’ৰ’নাৰ বাবে ফ্ৰেন্স অ’পেন কোৱালিফায়িঙৰ পৰা পাঁচগৰাকী খেলুৱৈ বাহিৰ
মহামাৰী ক’ৰ’না ভাইৰাছৰ সংক্ৰমণ তীব্ৰ হাৰত বৃদ্ধি পাই থাকিলেও সম্পূৰ্ণ ক’ভিড নীতি-নিয়ম মানি অনুষ্ঠিত হ’বলৈ গৈ আছে বিশ্বৰ অন্যতম সন্মানীয় টেনিছ টুৰ্ণামেণ্ট ফ্ৰেন্স অ’পেন।
অৱশ্যে টুৰ্ণামেণ্ট আৰম্ভ হোৱাৰ পূৰ্বে কিছু সমস্যাৰ সন্মুখীন হৈছে আয়োজক।
ক’ভিড প্ৰট’কলৰ মাজেৰে অনুষ্ঠিত কৰিবলৈ গৈ থকাৰ পিছতো টুৰ্ণামেণ্টৰ কোৱালিফায়িং ৰাউণ্ডত অংশ লোৱা পাঁচগৰাকী খেলুৱৈ ক’ৰ’নাত আক্ৰান্ত হোৱাৰ খবৰ আহিছে।
টুৰ্ণামেণ্টত অংশ ল’বলৈ আহি কৰা ক’ৰ’না টেষ্টত পাঁচগৰাকী খেলুৱৈক ক’ভিড পজিটিভ পোৱা যায়।
ইয়াৰে তিনিজন এজন ক’ভিড পজিটিভ প্ৰশিক্ষকৰ সংস্পৰ্শলৈ আহিছিল আৰু যাৰ পাছত এই তিনিওজনো ক’ভিড-১৯ত আক্ৰান্ত হয়।
দেওবাৰে ফ্ৰেন্স অ’পেন টেনিছ মহাসংঘই এটা বক্তব্যত কয় যে ক’ৰ’নাত আক্ৰান্ত এই পাঁচগৰাকী খেলুৱৈ আগন্তুক পাঁচদিনৰ বাবে আইছ’লেশ্যনত থাকিব।
ইয়াৰ উপৰি এই পাঁচগৰাকী খেলুৱৈয়ে অহা ২৭ ছেপ্তেম্বৰৰ পৰা আৰম্ভ হ’বলগীয়া টুৰ্ণামেণ্টৰ কোৱালিফায়াৰত অংশ ল’ব নোৱাৰিব।
উল্লেখ্য যে আয়োজকে ক’ৰ’নাত আক্ৰান্ত খেলুৱৈ কেইগৰাকী আৰু প্ৰশিক্ষকৰ নাম প্ৰকাশ কৰাৰ পৰা বিৰত আছে।