নাগালেণ্ড ভাৰতৰ বাহিৰত? Flipkartৰ জ্ঞানক লৈ ছচিয়েল মিডিয়াত তুমুল প্ৰতিক্ৰিয়া
নাগালেণ্ডত ফ্লিপকাৰ্টৰ চাৰ্ভিছ দিয়া নহয়, কিয়নো উত্তৰ-পূবৰ এই ৰাজ্যখন হেনো ভাৰতৰ বাহিৰত।
জনপ্ৰিয় ই-কমাৰ্ছ ছাইট ফ্লিপকাৰ্টৰ এই মন্তব্যৰ পাছত ছচিয়াল মিডিয়াত তীব্ৰ প্ৰতিক্ৰিয়াৰ সৃষ্টি হৈছে। সংস্থাটো বিভিন্নজনৰ ৰোষত পৰে।
নিজৰ ভুল বুজিব পাৰি ফ্লিপকাৰ্টে ততাতয়াকৈ ক্ষমা বিচাৰিলে যদিও মাৰ যোৱা নাই ক্ষোভৰ বহিৰ্প্ৰকাশ।
উৎসৱকালীন সময়ত ফ্লিপকাৰ্টে বিগ-বিলিয়ন ডে’ৰ অফাৰ আৰম্ভ কৰিছে। সংস্থাটোৱে ছচিয়েল মিডিয়াৰ জৰিয়তে ইয়াৰ প্ৰচাৰো চলাইছে।
সংস্থাটোৰ ফেচবুক পেজত নাগালেণ্ডৰ এগৰাকী গ্ৰাহকে অভিযোগ কৰে যে ৰাজ্যখনত ফ্লিপকাৰ্টৰ চাৰ্ভিছ পোৱা নাযায়। এনেকুৱা কিয় হয় সেয়া গ্ৰাহকগৰাকীয়ে জানিব বিচাৰে।
ইয়াৰ উত্তৰত ফ্লিপকাৰ্টে লিখিলে,’’কথাটো দানিব পাৰি বেয়া লাগিছে। আপোনাৰ ক্ৰয় কৰাৰ আগ্ৰহক আমি সন্মান কৰো। কিন্তু আমাৰ চাৰ্ভিছ ্পভাইডাৰসকলে ভাৰতৰ বাহিৰত সামগ্ৰী ডেলিভাৰি নকৰে।‘’
ডিমাপুৰৰ সংবাদ মাধ্যমত এই বিষয়ে বাতৰি প্ৰকাশ হোৱাৰ সমান্তৰালকৈ ছচিয়েল মিডিয়াতো ইয়াৰ স্ক্ৰীণ শ্বটটো ভাইৰেল হৈ পৰে। ইয়াৰ পাছতে ফ্লিপকাৰ্টক উদ্দেশ্যি আৰম্ভ হয় তুমুল সমালোচনা।
বহুতেই মন্তব্য কৰিছে যে ভাৰতৰ দৰে এখন বৃহৎ দেশত ব্যৱসায় সাম্ৰাজ্য মেলি দিয়া ই-কমাৰ্ছ ছাইটটোৱে দেশখনৰ ভূগোল-ইতিহাসৰ সামান্যতম জ্ঞান ৰখা উচিত।
নাগালেণ্ডক ভাৰতৰ বাহিৰৰ বুলি কৰা মন্তব্য কৰি কৰা ভুলৰ কোনো ক্ষমা নাই বুলিও একাংশ য়ুজাৰে মত প্ৰকাশ কৰিছে।
উক্ত ফেচবুক পেজতেই ফ্লিপকাৰ্টে ইয়াক এক অনিচ্ছাকৃত ভুল বুলি কৈ তাৰ বাবে ক্ষমা বিচাৰে আৰু ভৱিষ্যতে এনে ভুল নহয় বুলি জনায়।
পিচে, দেশৰ স্বাভিমানী নাগৰিকৰ বাবে ফ্লিপকাৰ্টৰ এই ভুল মাৰাত্মক আৰু ইয়াত কোনো আপোচৰ প্ৰশ্ন থাকিব নোৱাৰে।