হাতীৰ সলনি গোলাঘাটত মানুহৰ গাত বনকর্মীৰ গুলী
প্ৰতীকী ছবি।
গোলাঘাটৰ নাহৰবাৰী চাহ বাগিচাত বন কৰ্মীয়ে বনৰীয়া হাতীৰ জাকলৈ মৰা গুলীয়ে আঘাত কৰাৰ ফলত ফ্ৰেংকলিন বিলুং নামৰ এজন লোক আহত হৈছে।
ভৰিত গুলী লগা যুৱকজন বৰ্তমান অৱশ্যে বিপদমুক্ত বুলি জানিব পৰা গৈছে।
নাহৰবাৰী চাহ বাগিচাত বুধবাৰে পুৱা প্ৰৱেশ কৰা প্ৰায় ৬০টা হাতীৰ বৃহৎ জাকটো বনকৰ্মীয়ে খেদিবলৈ চেষ্টা কৰা অৱস্থাত তাত উপস্থিত যুৱকজনক আঘাত কৰে লক্ষ্যভ্ৰষ্ট গুলীয়ে।
নামবৰ হাবিৰ পৰা ওলাই আহি হাতীৰ বৃহৎ জাকটোৱে জিলাখনৰ কৌৱানী অঞ্চলত উপদ্রৱ চলাইছিল।
বনকৰ্মীৰ খেদাত নাহৰবাৰী বাগিচা এৰা জাকটোৱে বুধবাৰে দিনৰ প্ৰায় ১.৩০ বজাত উল্টাজান বনুৱা মধ্য ইংৰাজী বিদ্যালয়ৰ কাষতে লাগি থকা প্রভাকৰ চাহ বাগিচাত সোমাইছে আৰু বাগিচাৰ কাষত থকা খেতিপথাৰ নষ্ট কৰিছে বুলি জানিব পৰা গৈছে।