বন মন্ত্ৰী পৰিমল শুক্লবৈদ্যই দৰ্শনাৰ্থীৰ বাবে পুনৰ মুকলি কৰিলে অসম ৰাজ্যিক চিৰিয়াখানা

দীৰ্ঘদিন ধৰি বন্ধ হৈ থকা অসম ৰাজ্যিক চিৰিয়াখানা ও উদ্ভিদ উদ্যানখন আজি দৰ্শনাৰ্থীৰ বাবে পুনৰ মুকলি কৰা হয়।

ৰাজ্যৰ বন মন্ত্ৰী পৰিমল শুক্লবৈদ্যই কেইবাগৰাকীও জ্যেষ্ঠ বনবিষয়াৰ উপস্থিতিত আনুষ্ঠানিকভাৱে চিৰিয়াখানাখন মুকলি কৰে।

উল্লেখ্য যে, ক’ভিড-১৯ৰ ভয়াৱহ পৰিস্থিতিৰ ফলত দেশজুৰি হোৱা লকডাউনৰ পৰাই বন্ধ হৈ আছিল গুৱাহাটীস্থিত চিৰিয়াখানাখন।

চিৰিয়াখন পুনৰ মুকলি কৰা অনুষ্ঠানৰ ছবি শ্বেয়াৰ কৰি মন্ত্ৰী শুক্লবৈদ্যই টুইটাৰত লিখে যে কেৱল অনলাইনযোগেহে টিকট বুকিং কৰিব পাৰিব।

দৰ্শনাৰ্থীসকলে assamstatezoo.in যোগে টিকট বুক কৰিব পাৰিব।

Formally opened the @assamzoo today in presence of senior forest officials post lockdown.Ticketing system has been made completely online by booking through https://t.co/K2jr5Wa1ce
Visitors can step in & enjoy this flora & fauna hotspot from 2nd Jan,2021. pic.twitter.com/arhnWWUYS9

— Parimal Suklabaidya (@ParimalSuklaba1) December 31, 2020

উল্লেখ্য যে দৰ্শনাৰ্থীসকলে অহা ২ জানুৱাৰিৰ পৰাহে চিৰিয়াখানাৰ জীৱ-জন্তু তথা ইয়াৰ প্ৰাকৃতিক সৌন্দৰ্য উপভোগ কৰিব পাৰিব বুলি মন্ত্ৰীজনে টুইটাৰত উল্লেখ কৰে।

ইয়াৰ পূৰ্বে চিৰিয়াখানাখন ১ ডিচেম্বৰৰ পৰা মুকলি কৰাৰ পৰিকল্পনা কৰিছিল যদিও ক’ৰ’না সংক্ৰমণৰ প্ৰতি লক্ষ্য ৰাখি কৰ্তৃপক্ষই এই সিদ্ধান্ত বাতিল কৰিছিল।

ৰাজ্যিক চিৰিয়াখানা পুনৰ মুকলি সন্দৰ্ভত ইয়াৰ মাণ্ডলিক বন বিষয়া (ডি এফ অ’) তেজাছ মৰিস্বামীয়ে নিৰ্দিষ্ট মান তথা প্ৰচলন প্ৰক্ৰিয়া (এছ ও পি) জাৰি কৰা বুলি জনায়।

ক’ৰ’না সংক্ৰমণ ৰোধৰ বাবে ক’ভিড সম্পৰ্কীয় সকলো নীতি-নিৰ্দেশনাসমূহ মানি চলা হ’ব বুলিও বন বিষয়া গৰাকীয়ে জানিবলৈ দিয়ে।

তেওঁ লগতে জানিবলৈ দি কয় যে এদিনত ১০০০ জনহে দৰ্শনাৰ্থীক প্ৰৱেশ কৰিব দিয়া হ’ব।

দৰ্শনাৰ্থীৰ লগতে চিৰিয়াখানাৰ কৰ্মচাৰীয়ে মাস্ক পৰিধান কৰা, চেনিটাইজাৰ ব্যৱহাৰ আৰু সামাজিক দূৰত্ব মানি চলিব লাগিব বুলিও জনাই ডি এফ অ’ গৰাকীয়ে।