দৰঙত সংঘৰ্ষত আহত সেনা বিষয়াৰ লগতে দুই সন্দেহজনক এন ডি এফ বিৰ সদস্য

শনিবাৰে নিশা দৰং জিলাৰ পানবাৰী আৰক্ষী চকীৰ অন্তৰ্গত বৰঝাৰ গাঁৱত হোৱা এটা সংঘৰ্ষত সেনাৰ এজন বিষয়া আৰু দুজন   সন্দেহজনক এন ডি এফ বি সদস্য আহত হয়। আহত সেনা বিষয়াজন কেপ্টেইন এ প্ৰভাকৰ বুলি জানিব পৰা গৈছে।

দৰং আৰক্ষীৰ সূত্ৰৰ পৰা পোৱা তথ্য অনুসৰি সেনাৰ এটা তহলদাৰী দলে উক্ত অঞ্চলটোত সেইদিনা নিশা তিনিজন ব্যক্তিক সন্দেহজনকভাৱে ঘূৰা-ঘূৰি কৰি থকা দেখা পায়। ফলত সেনাৰ দলটোৱে ব্যক্তি কেইজনক ৰ’বলৈ নিৰ্দেশ দিয়ে যদিও ব্যক্তি কেইজন নোৰোৱাত সেনাৰ দলটোৱে গুলী চালনা কৰে।

ইফালে কেপ্টেইন প্ৰভাকৰৰ নেতৃত্বত সেনাৰ দলটোৱে তাৎক্ষনিকভাৱে গাড়ীৰ পৰা নামি আহি ব্যক্তি কেইজনক ধৰিবলৈ চেষ্টা কৰে। ফলত সেনাৰ দলটো আৰু সন্দেহজনক ব্যক্তি কেইজনৰ মাজত হোৱা সংঘৰ্ষৰ মাজতে এজনে সেনা বিষয়া প্ৰভাকৰক চোকা অস্ত্ৰৰে আঘাত কৰি পলাই যাবলৈ সক্ষম হয়। অৱশ্যে ইয়াৰে বাকী দুজনক সেনাৰ দলটোৱে কৰায়ত্ত কৰিবলৈ সক্ষম হয়।

আনহাতে কেপ্টেইন প্ৰভাকৰে দুৰ্বৃত্তৰ আক্ৰমণত বাওঁ হাতত আঘাত পায় বুলি জানিব পৰা গৈছে।

আটকাধীন ব্যক্তি কেইজন ওদালগুৰি জিলাৰ পূব খাছিয়াবাৰী গাঁৱৰ নিৱাসী মাৰকাশ বসুমতাৰী(৩২) আৰু আনজন একে জিলাৰে ফাচিয়া গাঁৱৰ নিৱাসী সিমন বাগলাৰী(৪৫) বুলি সেনা দলটোৱে চিনাক্ত কৰিছে।

ধৃত ব্যক্তি কেইজনৰ পৰা সেনাই দুটা দেশীয় ৰাইফল, এখন চোকা খুকুৰি আৰু বিস্ফোৰক সামগ্ৰী উদ্ধাৰ কৰে।

আনহাতে আঘাতপ্ৰাপ্ত সেনা বিষয়া কেপ্টেইন প্ৰভাকৰক জি এম চি এইচত ভৰ্তি কৰাৰ বিপৰীতে আঘাতপ্ৰাপ্ত সন্দেহজনক এন এফ বিৰ সদস্য কেইজনক মঙলদৈৰ অসামৰিক হাস্পাতালত ভৰ্তি কৰোৱা হয়।

ইফালে আৰক্ষীয়ে বৰ্তমানলৈকে ধৃত লোক কেইজন এন ডি এফ বিৰ সৈতে জড়িত হয় নে নহয় এই ক্ষেত্ৰত কোনো নিশ্চয়তা প্ৰদান কৰিব পৰা নাই।