হিমন্তৰ কামে হৰ্চট্ৰেডিং, মই কতো আত্মসমৰ্পন কৰা নাই হিমন্তইহে কৰিছে : তৰুণ গগৈ

ৰাজ্য সভাৰ নিৰ্বাচন সন্দৰ্ভত প্ৰতিক্ৰিয়া প্ৰকাশ কৰি প্ৰাক্তন মুখ্য মন্ত্ৰী তৰুণ গগৈয়ে তেওঁলোক সুখী বুলি মত ব্যক্ত কৰে।

‘‘আমি এজন উমৈহতীয়া প্ৰাৰ্থী দিয়াৰ কথা ভাবি আছিলো, এতিয়া আমি সুখী যিহেতু এই ক্ষেত্ৰত কৃতকাৰ্য্যতা লাভ কৰিছো,’’ তৰুণ গগৈয়ে কয়।

আনহাতে, অজিত কুমাৰ ভূঞাই ৰাজ্যসভাৰ প্ৰাৰ্থী হ’ব সেয়া নিশ্চিত হৈছে বুলি মন্তব্য কৰি প্ৰিয়ংকা গান্ধীৰ নাম চৰ্চালৈ অহাই নাই বুলি গগৈয়ে কয়।

‘‘প্ৰিয়ংকাৰ নাম চৰ্চালৈ আহিলে কোনে বাধা দিব৷ তেওঁ ইচ্ছাও কৰা নাই,’’ গগৈ লগতে কয়।

কংগ্ৰেছ আৰু এআইয়ুডিএফৰ মিত্ৰতাক ২০২১ নিৰ্বাচনত ৰাইজে ভালকৈহে গ্ৰহণ কৰিব বুলি উল্লেখ কৰি প্ৰাক্তন মুখ্য মন্ত্ৰী গগৈয়ে এআইয়ুডিএফৰ লগত বিজেপিয়েহে প্ৰথমে হাত মিলাইছে বুলি লগতে কয়।

বিজেপিয়ে হাত মিলালে ভাল আৰু আমি হাত মিলালে বেয়া, প্ৰেম কৰিলে খোলা-খুলিকৈ কৰিব লাগে বুলিও বিজেপিক সমালোচনা কৰে তৰুণ গগৈয়ে।

সৰ্বানন্দ সোণোৱাল চৰকাৰে অসমবাসীক ঠগাইছে বুলিও মন্তব্য কৰি তৰুণ গগৈয়ে ইয়াৰ প্ৰত্যুত্তৰ তেওঁলোকে বিধানসভা নিৰ্বাচনত লাভ কৰিব বুলি কয়।

তদুপৰি, হিমন্তই ৰাজ্যসভাৰ তৃতীয়টো পদৰ বাবেও চিন্তা কৰিম বুলি কোৱা প্ৰসংগ সম্পৰ্কত সাংবাদিকে সোধা প্ৰশ্নত গগৈয়ে কয়, ‘‘তেওঁ আশ্বাসেই দিছিল আমি জিকাই দিম৷ সেয়েহে তেওঁ চেষ্টা কৰিব কাৰণ তেওঁৰটো টকা-পইচা ভৰি আছে৷ বিজেপিয়ে দুৰ্নীতিৰ কথা কয় সেই দলেই বৰ্তমান ধনী৷ হিমন্ত, ভূৱনেশ্বৰ কলিতা, জ্যোতিৰাদিত্য সিন্ধিয়া সকলো ক্ষমতা লোভী।’’

হিমন্ত আৰু তেওঁলোকক অসমৰ ৰাইজে কিমান সন্মান কৰে এয়া অসমৰ ৰাইজে জানে বুলিও কটাক্ষ কৰে গগৈয়ে।

‘‘মই কতো আত্মসমৰ্পণ কৰা নাই হিমন্তইহে সকলোতে আত্মসমৰ্পণ কৰি আহিছে। এতিয়া ভয়ত বিজেপিত যোগদান কৰিছে৷ হৰ্চট্ৰেডিং কৰিবই হিমন্তৰটো কাম কি৷ কোনোবা গলেহে পাৰিব৷ হৰ্চট্ৰেডিং কৰিলেই হ’ল নেকি৷ সফল নহয় আমিওতো চাম৷ বিজেপিয়ে হৰ্চট্ৰেডিং কৰিবলৈয়েতো তেওঁক লৈ গৈছে,’’ তৰুণ গগৈৰ মন্তব্য।

ভুৱনেশ্বৰ কলিতাক ৰাজ্যসভাৰ টিকট দিয়ে নিদিয়ে সেয়া বিজেপিৰ কথা বুলি উল্লেখ কৰে জেষ্ঠ গগৈয়ে।

ইপিনে, মই বদৰুদ্দিন মুখ্যমন্ত্ৰী হবলৈ নিদিওঁ, অসমৰ যদি বেলেগে পাতে মই কি কৰিম বুলি মত প্ৰকাশ কৰি গগৈয়ে ৱাজেদ আলী আগতেও মন্ত্ৰী আছিল৷ হিমন্তৰ লগত থাকিলে ভাল আছিল৷ অসমত কি সংখ্যালঘু মন্ত্ৰী হব নালাগে নেকি বুলিও প্ৰশ্ন কৰে।