প্ৰয়াত প্ৰাক্তন মুখ্য মন্ত্ৰী তৰুণ গগৈৰ পদ চিহ্ন সংগ্ৰহ কৰিলে পূৰ্ণ শিল্পম শিল্পালয়ে

প্ৰয়াত প্ৰাক্তন মুখ্য মন্ত্ৰী তৰুণ গগৈৰ পদ চিহ্ন বা চাপ সংগ্ৰহ কৰিলে পূৰ্ণ শিল্পম শিল্পালয়ে।

আজি চৰকাৰী বাসগৃহত গগৈৰ নশ্বৰ দেহ ৰাখি থোৱা অৱস্থাতে পৰিয়ালৰ অনুমতি লৈ সংগ্ৰহ কৰে ভৰিৰ চাপ।

সেই চাপৰ পৰাই গগৈৰ পদ যুগল বা পদচিহ্ন নিৰ্মাণ কৰি সংৰক্ষণৰ ব্যৱস্থা কৰিব পূৰ্ণ শিল্পম শিল্পালয়ে।

পূৰ্বতে ভূপেন হাজৰিকাৰ পদযুগল নিৰ্মাণ কৰি সংৰক্ষণ কৰি ৰাখিছিল এই শিল্পালয়ে।

ভৱিষ্যতেও বেলতলাস্থিত পূৰ্ণ শিল্পমে বৰেণ্য ব্যক্তি সকলৰ পদ চিহ্ন সংগ্ৰহ কৰি সংৰক্ষণ কৰি যাব বুলি পূৰ্ণ শিল্পমৰ গৰাকী দিগন্ত মাধৱ গোস্বামীয়ে জানিবলৈ দিয়ে।

ইতিমধ্যে, গগৈৰ শেষকৃত্য অনুষ্ঠানৰ বাবে সাজু কৰি তোলা হৈছে নৱগ্ৰহ শ্মশান। পৰিষ্কাৰ কৰা হৈছে সমগ্ৰ শ্মশান চৌহদ। নৱগ্ৰহ শ্মশানৰ তিনি নম্বৰ চিতাখনত সৎকাৰ কৰা হ’ব বৰ্ষীয়ান ৰাজনীতিক গৰাকীৰ নশ্বৰ দেহ।

সৎকাৰৰ পূৰ্বে ইয়াতেই ৰাষ্ট্ৰীয় মৰ্যাদাৰে প্ৰাক্তন মুখ্য মন্ত্ৰী গৰাকীক শেষ শ্ৰদ্ধা নিবেদন কৰা হ’ব। প্ৰথমতে টাই আহোমৰ পৰম্পৰাগ ৰীতি আৰু পাছত হিন্দু নিয়ম অনুসৰি কৰা হ’ব অন্তিম সৎকাৰ।

শৱদেহ দাহনৰ সময়ত সেই স্থানত চৰকাৰ, বিভিন্ন সংগঠন তথা গুণমুগ্ধ উপস্থিত থাকিব পৰাকৈ কৰা হৈছে সকলো ব্যৱস্তা। তৰুণ গগৈৰ নিজা সমষ্টি তিতাবৰৰ পৰা অহা লোকৰ বাবে ১০০ খন আসন সংৰক্ষণৰ বিশেষ ব্যৱস্থা গ্ৰহণ কৰিছে প্ৰশাসনে।