পৰীক্ষণ অবিহনেই ৰাষ্ট্ৰীয় নাগৰিক পঞ্জীত সোমাল ১৩ লক্ষাধিক লোকৰ নাম-দাবী প্ৰাক্তন সমন্বয়ক হিতেশ দেৱ শৰ্মাৰ

লাখ লাখ বিদেশী নাগৰিকৰ নাম ৰাষ্ট্ৰীয় নাগৰিক পঞ্জীত অন্তৰ্ভুক্ত হোৱাৰ বিপৰীতে বাদ পৰিল একাংশ খিলঞ্জীয়াৰ নাম। সেইবাবে ৰাষ্ট্ৰীয় নাগৰিক পঞ্জীৰ সম্পূৰ্ণ পুনৰীক্ষণৰ প্ৰয়োজন বুলি এন আৰ চিৰ প্ৰাক্তন ৰাজ্যিক সমন্বয়ক হিতেশ দেৱ শৰ্মাই শেহতীয়াকৈ উল্লেখ কৰিছে।

অসমৰ অন্যতম সংবাদ প্ৰতিষ্ঠান দ্য আছাম ট্ৰিবিউনৰ সৈতে হোৱা বাৰ্তালাপত শৰ্মাই কয় যে ৰাজ্যিক সমন্বয়ক হোৱাৰ পাছত শৰ্মাই দলগাঁও আৰু বাঘবৰৰ দৰে অঞ্চলত নমুনা পৰীক্ষণ কৰিছিল য’ত প্ৰায় ৪০ শতাংশ ভুল পোৱা গৈছিল।

শৰ্মাই কয় যে নথি-পত্ৰৰ বেক-এণ্ড ভেৰিফিকেচন অবিহনে ১৩,২০,০০০ ব্যক্তিৰ নাম অন্তৰ্ভুক্ত কৰা হৈছিল। লগতে তেওঁ কয় যে চমৰীয়া ব্লকৰ প্ৰায় ৬৪ হাজাৰ লোকৰ নাম এন আৰ চিত মূল বাসিন্দা হিচাপে অন্তৰ্ভুক্ত কৰা হৈছে। কিন্তু সেইসকল সকলো সন্দেহযুক্ত অনুপ্ৰৱেশকাৰী কাৰণ খিলঞ্জীয়া লোক চৰ অঞ্চলত নাথাকে।

কিছুমান অঞ্চলত ভেৰিফাইং অফিচাৰ আৰু ডাটা এণ্ট্ৰি অপাৰেটৰ দুয়োজনেই এটা বিশেষ সম্প্ৰদায়ৰ আছিল আৰু তথ্য সৈতে হেৰফেৰ কৰাৰ সকলো সম্ভাৱনা আছে বুলি শৰ্মাই শংকা ব্যক্ত কৰে। তদুপৰি এনআৰচি প্ৰস্তুত কৰাত ব্যৱহৃত ছফটৱেৰত এটা ডাঙৰ দোষ আছে বুলি শৰ্মাই আঙুলিয়াই দিয়ে। তথ্য সন্নিৱিষ্ট কৰাৰ পাছত জ্যেষ্ঠ বিষয়াসকলে গুণগত মান পৰীক্ষাৰ কোনো প্ৰক্ৰিয়া নাছিল বুলিও তেঁও উল্লেখ কৰে। তেওঁ আৰু কয় যে ২০১৬ চনত এন আৰ চিৰ কাৰ্যবাহী সঞ্চালক হৈ থকাৰ সময়ত তেওঁ এই সমস্যাটো বহু আগতেই আঙুলিয়াই দিছিল যদিও তেতিয়াৰ ৰাজ্যিক সমন্বয়কজনে সেই কথাত গুৰুত্ব দিয়া নাছিল। শৰ্মাই কয় যে, পৰ্যাপ্ত গুণগত মান পৰীক্ষাৰ অভাৱত খিলঞ্জীয়াৰ নামো বাদ পৰিল। লগতে তেওঁ কয় যে বিভিন্ন জিলালৈ নথি পৰীক্ষণৰ বাবে মানুহক মাতি অনা হৈছিল, যিটো ত্ৰুটিপূৰ্ণ আছিল আৰু সকলোকে গৃহ জিলাতে নথি পৰীক্ষণৰ সুযোগ দিয়া উচিত আছিল।