চৰাইদেউত বানত উটি গ’ল একেটা পৰিয়ালৰে চাৰিজন সদস্য

চৰাইদেউ জিলাৰ টেঙাপুখুৰী আৰক্ষী থানাৰ অন্তৰ্গত লাকুৱা অভয়পুৰীয়া গাঁৱত যোৱা নিশা হঠাতে অহা বাঢ়নী পানীয়ে সমগ্ৰ গাঁৱখন প্লাবিত কৰে। গাঁৱখনৰ ৰোহিনী দুৱৰাৰ বাসগৃহটোত পানী সোমোৱাত পৰিয়ালটোৰ সদস্যসকলে ওখ ঠাইত আশ্ৰয় বিচাৰি ঘৰৰ পৰা ওলাই আহে। কিন্তু পথৰ ওপৰেদি বৈ যোৱা কোবাল সোঁতত ৰোহিনী দুৱৰাৰ পত্নী টুটুমণি দুৱৰা আৰু কন্যা বিদিশা দুৱৰা উটি যায়।

এই ঘটনাৰ খবৰ পাই দুই পুত্ৰ বিদ্যুৎ দুৱৰা আৰু বিপ্লৱ দুৱৰাই পানীত নামি তেওঁলোকক বিচাৰিবলৈ চেষ্টা কৰে যদিও দুয়োকে কোবাল সোঁতে উটুৱাই নিয়ে। এই কৰুণ ঘটনাটো নিশা প্ৰায় ৭ বজাত সংঘটিত হয়।

ঘটনাটোৰ লগে লগে পৰিয়ালৰ লোকে জিলা প্ৰশাসনে প্ৰদান কৰা হেল্পলাইন নম্বৰলৈ ফোন কৰে যদিও কোনো সঁহাৰি লাভ নকৰে। পৰৱৰ্তী সময়ত চৰাইদেউ জিলাৰ আয়ুক্ত ড° নেহা যাদৱক ফোনযোগে অৱগত কৰাত তেওঁ উদ্ধাৰকাৰী দল পঠিওৱাৰ আশ্বাস দিয়ে। কিন্তু, সোমবাৰে দিনৰ ১ বজালৈকে জিলা প্ৰশাসন তথা আৰক্ষীৰ পৰা কোনো ধৰণৰ সঁহাৰি লাভ নকৰাত স্থানীয় ৰাইজ ক্ষুব্ধ হৈ পৰে।

ইফালে, গাঁৱখনৰ একেটা পৰিয়ালৰ চাৰিজনকৈ সদস্য বাঢ়নী পানীত নিখোজ হোৱা ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰাৰ লগতে গভীৰ শোকৰ ছাঁ পেলাইছে।