হত্যা, ধন দাবীকে ধৰি বহু অভিযোগ; দিল্লীত এনকাউণ্টাৰত নিহত বিহাৰৰ ৪ ‘ম’ষ্ট ৱাণ্টেড’ দাগী অপৰাধী
দিল্লীত এনকাউণ্টাৰত নিহত হৈছে বিহাৰৰ চাৰিজন দাগী অপৰাধী। দিল্লী আৰু বিহাৰ আৰক্ষীৰ যৌথ অভিযানত নিহত ‘ম’ষ্ট ৱাণ্টেড’ অপৰাধীকেইজন। দিল্লীৰ বাহাদুৰ শ্বাহ অঞ্চলত বুধবাৰে গভীৰ নিশা সংঘটিত হয় এই ঘটনা।
এনকাউন্টাৰত নিহত কেইজনৰ নাম হ’ল ৰঞ্জন পাঠক (২৫), বিমলেশ মাহাটো (২৫), মনীষ পাঠক (৩৩) আৰু অমন ঠাকুৰ (২১)।
আৰক্ষীৰ সূত্ৰ অনুসৰি, বুধবাৰে নিশা ডি এছ পি সঞ্জীৱ যাদৱৰ নেতৃত্বত দিল্লী আৰক্ষীৰ অপৰাধ শাখা আৰু বিহাৰ আৰক্ষীৰ এটা যৌথ দলে অপৰাধীক কৰায়ত্ত কৰিবলৈ চেষ্টা কৰে। কিন্তু অপৰাধীৰ দলটো পলাই যায়।
আৰক্ষীয়ে তেওঁলোকক খেদি পিছ লয়। সেই সময়ত দিল্লীৰ ৰোহিনী অঞ্চলৰ বাহাদুৰ শ্বাহ মাৰ্গত আৰক্ষীৰ সৈতে গুলীয়াগুলিৰ সময়ত গুৰুতৰভাৱে আহত হয় অপৰাধীকেইজন। পিছত বি এছ এ হাস্পতাললৈ নিয়াৰ সময়ত চিকিৎসকে তেওঁলোকক মৃত ঘোষণা কৰে।
বাতৰি অনুসৰি, এই অভিযানত অপৰাধীৰ সৈতে হোৱা গুলীয়াগুলিত ৩ জন আৰক্ষীৰ লোকো আহত হয়।
আৰক্ষীৰ সূত্ৰ অনুসৰি, বিহাৰত হত্যা আৰু অবৈধ অস্ত্ৰ ৰখাকে ধৰি কেইবাটাও গোচৰত চাৰিওজনেই অভিযুক্ত আছিল। ৰঞ্জন পাঠক আৰু বিমলেশ মাহাটোৰ বিৰুদ্ধে ভাৰতীয় দণ্ডবিধিৰ কেইবাটাও গুৰুতৰ ধাৰাত গোচৰ আছে।
আনহাতে, অমন ঠাকুৰৰ বিৰুদ্ধে এজন ব্যক্তিক হত্যা কৰাৰ অভিযোগ আছে। এই দলৰ লগত আৰু কোন কোন জড়িত আছিল আৰক্ষীয়ে তাৰ তদন্ত অব্যাহত ৰাখিছে।