চত্তীশগড়ৰ ছুকমাত নিৰাপত্তা বাহিনীৰে সংঘৰ্ষত নিহত ৪ মাওবাদী
ক’ৰ’ণাতংকৰ মাজতে চত্তীশগড়ত নিৰাপত্তা বাহিনীৰ আক্ৰমণত বিগত কিছু দিনত কেইবাজনো মাওবাদী নিহত হৈছে।
আজি পুনৰ ৰাজ্য খনৰ ছুকমা জিলাত নিৰাপত্তা বাহিনীৰ সৈতে হোৱা সংঘৰ্ষত ৪ জন মাওবাদী সদস্য নিহত হয়।
নিহত মাওবাদী কেইজনৰ পৰা অভিযানকাৰী যৌথ বাহিনীয়ে দেশীয় ভাবে নিৰ্মিত অস্ত্ৰৰ লগতে বহু অত্যাধুনিক অস্ত্ৰও উদ্ধাৰ কৰিবলৈ সক্ষম হয়।
বাষ্টাৰ জিলাৰ আৰক্ষী মহা পৰিদৰ্শক সুন্দৰৰাজ পিয়ে প্ৰকাশ কৰা মতে আজি পুৱা প্ৰায় ৯-৩০ বজাত আৰক্ষী, চি আৰ পি এফ , কোব্ৰা বাহিনীৰ দলে চত্তীশগড়ৰ জাগাৰগণ্ডা অঞ্চলৰ হাবিত মাওবাদীৰ বিৰুদ্ধে অভিযান আৰম্ভ কৰে।
নিৰাপত্ত বাহিনীৰ দলটোৱে জিলাখনৰ ফুলামপাৰ নামৰ অঞ্চলটো পোৱাৰ পিছতে মাওবাদীয়ে নিৰাপত্তা বাহিনীৰ ওপৰত গুলিবৰ্ষণ কৰিবলৈ আৰম্ভ কৰে।
প্ৰত্যুত্তৰত নিৰাপত্তা বাহিনীয়েও গুলিবৰ্ষণ কৰাত দুয়ো পক্ষৰ মাজত বহু সময় ধৰি সংঘৰ্ষ চলি থাকে।
সংঘৰ্ষৰ অন্তত নিৰাপত্তা বাহিনীয়ে বৃহৎ পৰিমাণৰ অস্ত্ৰ-শস্ত্ৰ উদ্ধাৰ কৰিবলৈ সক্ষম হোৱাৰ লগতে চাৰিজন মাওবাদীৰ মৃতদেহ উদ্ধাৰ কৰে।
ঘটনাস্থলীৰ পৰা কেইবাজনো মাওবাদীয়ে পলায়ন কৰিবলৈ সক্ষম হয় বুলি আৰক্ষীৰ মহাপৰিদৰ্শক গৰাকীয়ে প্ৰকাশ কৰিছে।
পলাতক মাওবাদী কেইজনৰ সন্ধানত নিৰাপত্তা বাহিনীয়ে সমগ্ৰ অঞ্চলটোতে অভিযান আৰম্ভ কৰিছে।