তামুলপুৰত বিনামূলীয়া চিকিৎসা শিবিৰ : তিনি শতাধিক ৰোগীয়ে কৰিলে স্বাস্থ্য পৰীক্ষা
বাক্সা জিলাৰ তামুলপুৰ মহকুমা সদৰৰ দিঘিলিপাৰস্থিত কাৰ্গিল ওৱেৰিয়ৰ সেনা চাউনিত ভাৰতীয় সেনাৰ ৰেড হৰ্ণ ডিভিজন, অসম মেডিকেল কলেজ এলুমিনি এছ’চিয়েশ্যন আৰু একাডেমিক ফ’ৰাম, গুৱাহাটীৰ যৌথ উদ্যোগত আৰু তামুলপুৰ আঞ্চলিক গ্ৰামদান সংঘৰ লগতে আশা দৰ্শন ট্ৰাষ্ট ( তামুলপুৰ )ৰ সহযোগত আজি এক বিনামূলীয়া চিকিৎসা শিবিৰ অনুষ্ঠিত হয়।
তামূলপুৰস্থিত সেনাৰ ৰেড হৰ্ণ ডিভিনৰ সেনা বিষয়া কৰ্ণেল অনিমেশ ঝাৰ তত্ত্বাৱধানত ৰাতিপুৱা ১০ বজাত অনুষ্ঠিত এই চিকিৎসা শিবিৰত চিকিৎসক নিৰ্মল কুমাৰ বেৰীয়াল, লুটফুৰ ৰহমান, গীতা খাউণ্ড, নৱজ্যোতি দত্ত, ধীৰেণ চহৰীয়া, বিভা দেৱী, উদয়ন কটকী, দামোদৰ দাসৰ উপৰি আন কেইবাজনো সহায়কে বৃহত্তৰ তামুলপুৰ অঞ্চলৰ তিনি শতাধিক লোকৰ বিনামূলীয়া স্বাস্থ্য পৰীক্ষা কৰাৰ উপৰি ৰোগীসকলৰ মাজত বিনামূলীয়াকৈ ঔষধ বিতৰণ কৰে।
চিকিৎসা শিবিৰটোত মেডিচিন বিভাগৰ উপৰি চকু, ই এন টি, স্ত্ৰী আৰু প্ৰসূতি, হিমাট’লজী বিভাগৰ বিশেষজ্ঞ চিকিৎসকে ৰোগীসকলৰ হাইপাৰটেনচন, মধুমেহ, হৃদৰোগ আদিৰ বাবে ৰোগীৰ স্বাস্থ্য পৰীক্ষা কৰাৰ উপৰি মহিলা সকলৰ গৰ্ভাশয়ৰ কৰ্কট ৰোগ চিনাক্ত কৰাৰ বাবে কেইবা গৰাকী মহিলাৰ স্বাস্থ্য পৰীক্ষা কৰা হয়।
ইয়াৰ উপৰি এই শিবিৰৰ লগত সংগতি ৰাখি এক বিনামূলীয়া ৰক্তদানৰ ব্যৱস্থাও কৰা হয়। এই ৰক্তদান কাৰ্যসূচীত কেইবাগৰাকী সেনা জোৱান আৰু সাধাৰণ লোকে ৰক্তদান কৰা দেখা যায়।
ভাৰতীয় সেনাৰ এনে বিনামূলীয়া চিকিৎসা শিবিৰে বৃহত্তৰ তামুলপুৰ অঞ্চলৰ বহু দুখীয়া পৰিয়ালক উপকৃত কৰাৰ লগতে সেনা বাহিনীৰ এনে সমাজসেৱা মূলক উদ্যোগক অঞ্চলটোৰ সকলো লোকে ভূয়সী প্ৰশংসা কৰাৰ লগতে কৃতজ্ঞতা জ্ঞাপন কৰিছে।