নগাঁও আৰক্ষীৰ জালত পুৰণিগুদামৰ ৰিলায়েঞ্চ পে’ট্ৰল পাম্পৰ ডকাইতি কাণ্ডত জড়িত ৭ টাকৈ ডকাইত

নগাঁৱৰ পুৰণিগুদামৰ ৰিলায়েঞ্চ পে’ট্ৰ’ল পাম্পত সংঘটিত ডকাইতি কাণ্ডৰ সৈতে জড়িত ৭ জনকৈ দুৰ্ধৰ্ষ ডকাইতক নগাঁও আৰক্ষীয়ে গ্ৰেপ্তাৰ কৰিবলৈ সক্ষম হৈছে।

নগাঁও আৰক্ষীয়ে অভিযান চলাই সোমবাৰে নিশা প্ৰায় ১ বজাত বঢ়মপুৰৰ পৰা ৭ টাকৈ ডকাইতক গ্ৰেপ্তাৰ কৰে। লগতে তেওঁলোকৰ পৰা আৰক্ষীয়ে ৭.৬৫ এম এম পিষ্টল আৰু .২২ পিষ্টল জব্দ কৰে।

কলিয়াবৰ মহকুমা আৰক্ষী বিষয়া মৃন্ময় দাস আৰু নগাঁও আৰক্ষীৰ উপ–আৰক্ষী অধীক্ষক জন দাসে নেতৃত্ব দিয়া অভিযানত ডকাইতি কাণ্ডৰ মাষ্টাৰমাইণ্ড ৰাজীৱ বৰদলৈৰ ঘৰৰ পৰা আৰক্ষীয়ে পেট্ৰ’ল পাম্পৰ পৰা লুটি নিয়া কম্পিউটাৰ ছেট, চিচিটিভি কেমেৰা আৰু বহু সামগ্ৰী উদ্ধাৰ কৰিবলৈ সক্ষম হয়।

উল্লেখযোগ্য যে যোৱা ১৭ নৱেম্বৰত নগাঁৱৰ পুৰণিগুদামৰ ৰিলায়েঞ্চ পেট্ৰ’ল পাম্পত ডকাইতৰ দলটোৱে ডকাইতি কাণ্ড সংঘটিত কৰিছিল।

ইয়াৰ পিছৰে পৰা আৰক্ষীয়ে ডকাইতি কাণ্ডত জড়িত অভিযুক্তক কৰায়ত্ত কৰাৰ বাবে অভিযান অব্যাহতৰাখিছিল আৰু অৱশেষত সোমবাৰে নিশা ৭ টা ডকাইতক গ্ৰেপ্তাৰ কৰিবলৈ সক্ষম হয়।