ৰাছিয়াৰ প্ৰভাৱৰ পৰা ভাৰতক মুক্ত কৰিবলৈ সক্ৰিয় জাৰ্মানী! টোপ অত্যাধুনিক চাবমেৰিনৰ

ইউক্ৰেইন যুদ্ধত বিভক্ত হৈ পৰিছে বিশ্ব। আমেৰিকা আৰু পশ্চিম ইউৰোপীয় দেশসমূহে ৰাছিয়াক বিচ্ছিন্ন কৰিবলৈ তৎপৰ হৈ পৰিছে। কিন্তু ভাৰত আৰু চীনৰ দৰে বিশ্বৰ অন্যতম শক্তি মস্কোৰ পক্ষত থকাৰ বাবে সেই প্ৰচেষ্টা সফল হোৱা নাই। সেয়ে ভাৰতক ৰাছিয়াৰ প্ৰভাৱৰ পৰা মুক্ত কৰিবলৈ এইবাৰ সক্ৰিয় হৈ পৰিছে জাৰ্মানী। এইবাৰ বাৰ্লিনে নতুন দিল্লীক অত্যাধুনিক চাবমেৰিনৰ টোপ দিছে।

বাতৰি অনুসৰি, জাৰ্মানীয়ে ভাৰতৰ সৈতে যুটীয়াভাৱে ছয়খন কনভেনশ্যনেল চাবমেৰিন নিৰ্মাণ কৰিবলৈ আগ্ৰহী। বাৰ্লিনে ভাৰতীয় নৌসেনাৰ আধুনিকীকৰণৰ বাবে ৫.২ বিলিয়ন ডলাৰৰ প্ৰকল্পৰ অধীনত অত্যাধুনিক ডিজেল-বৈদ্যুতিক চাবমেৰিন নিৰ্মাণ কৰিব বিচাৰে।

জাৰ্মান চেঞ্চেলৰ ওলাফ স্কলজ ২৫ ফেব্ৰুৱাৰীত দুদিনীয়া ভ্ৰমণত ভাৰতত উপস্থিত হ’ব। সেই ভ্ৰমণৰ সময়তে উক্ত চাবমেৰিনৰ বিষয়ে আলোচনা কৰাৰ কথা আছে।

পৰ্যবেক্ষকসকলৰ মতে, জাৰ্মানীয়ে ভাৰতক ৰাছিয়াৰ প্ৰভাৱৰ পৰা মুক্ত কৰিবলৈ সক্ৰিয় হৈ আছে। ছোভিয়েট আৰু ৰাছিয়াত নিৰ্মিত অস্ত্ৰ-শস্ত্ৰ সদায় ভাৰতীয় সেনাৰ মেৰুদণ্ড হৈ আহিছে। সেয়েহে, ইউক্ৰেইনৰ যুদ্ধৰ পৰিপ্ৰেক্ষিততো ভাৰতে শান্তিৰ বাৰ্তা প্ৰদান কৰিছে যদিও ভাৰত মস্কোৰ কাষত আছে। এইবাৰ জাৰ্মানীয়ে ৰাছিয়াৰ অস্ত্ৰৰ ওপৰত দিল্লীৰ নিৰ্ভৰশীলতা হ্ৰাস কৰিব বিচাৰিছে। শেহতীয়াকৈ বাৰ্লিনে এইটোও স্পষ্ট কৰি দিছিল যে ৰাছিয়াৰ পৰা ভাৰতৰ তেল ক্ৰয়ৰ ক্ষেত্ৰত ইয়াৰ কোনো দ্বিধা নাই।

বৰ্তমান, ভাৰতত প্ৰায় ১৬ খন ডিজেল-বৈদ্যুতিক চাবমেৰিন আছে। নৌসেনাৰ ওচৰত দুটা স্বদেশী ভাৱে নিৰ্মিত পাৰমাণৱিক শক্তিচালিত চাবমেৰিন আছে। মোডী চৰকাৰে ভাৰত মহাসাগৰত চীনৰ আধিপত্য প্ৰতিহত কৰিবলৈ নিজৰ চাবমেৰিন শক্তি বৃদ্ধি কৰিব বিচাৰে। জাৰ্মানীয়ে সেই সুযোগ গ্ৰহণ কৰি ভাৰতত অস্ত্ৰৰ বজাৰ দখল কৰিবলৈ চেষ্টা কৰি আছে।

প্ৰতিৰক্ষা বিশ্লেষকৰ একাংশই ধাৰণা কৰে যে চীনে ভাৰতৰ ওপৰত চাপ সৃষ্টি কৰিবলৈ ভাৰত মহাসাগৰত ইয়াৰ কাৰ্যকলাপ বৃদ্ধি কৰিছে। চীনে ভাৰত-আমেৰিকা যুক্তৰাষ্ট্ৰ-জাপান-অষ্ট্ৰেলিয়াৰ চতুৰ্দেশীয় অক্ষৰ ওপৰত চাপ সৃষ্টি কৰিবলৈ এই পদক্ষেপ গ্ৰহণ কৰিছে। সৰ্বোপৰি, চীনা সেনাই যুদ্ধৰ ক্ষেত্ৰত চুৱেজ খাললৈ যোৱা জলপথত অৱৰোধ সৃষ্টি কৰি নতুন দিল্লীৰ উদ্বেগ বৃদ্ধি কৰিব পাৰে।