‘ঘূছখোৰ পণ্ডিত’ ছবিৰ শিৰোনাম সলনি কৰিবলৈ মান্তি হ’ল নেটফ্লিক্স

মনোজ বাজপেয়ী অভিনীত আহিবলগীয়া ছবি ঘূছখোৰ পণ্ডিতৰ শিৰোনামক লৈ চলি থকা বিতৰ্কৰ অৱশেষত অন্ত পৰিল। ছবিখনৰ নামক লৈ সৃষ্টি হোৱা তীব্ৰ বিবাদৰ পৰিপ্ৰেক্ষিতত নেটফ্লিক্স আৰু ছবিখনৰ প্ৰযোজকসকলে ছবিখনৰ নাম সলনি কৰাৰ সিদ্ধান্ত গ্ৰহণ কৰিছে। মঙলবাৰে দিল্লী উচ্চ ন্যায়ালয়ত নেটফ্লিক্সে এই কথা জনাই কয় যে জনসাধাৰণৰ আৱেগ আৰু বিভিন্ন পক্ষৰ উদ্বেগৰ প্ৰতি লক্ষ্য ৰাখি তেওঁলোকে এই সচেতন সিদ্ধান্ত লৈছে। ছবিখনৰ নতুন নামটোৱে ইয়াৰ মূল কাহিনী আৰু উদ্দেশ্যক অধিক সঠিকভাৱে প্ৰতিফলিত কৰিব বুলিও কোম্পানীটোৱে আদালতক অৱগত কৰে।

মহেন্দৰ চতুৰ্বেদী নামৰ এজন ব্যক্তিয়ে ছবিখনৰ মুক্তিৰ বিৰুদ্ধে দিল্লী উচ্চ ন্যায়ালয়ত এখন আবেদন দাখিল কৰিছিল। তেওঁৰ অভিযোগ আছিল যে ছবিখনৰ পূৰ্বৰ শিৰোনামটোৱে এটা বিশেষ সম্প্ৰদায়ৰ মৰ্যাদাহানি কৰিছে। আবেদনকাৰীৰ অধিবক্তা বিনীত জিন্দলে যুক্তি দিছিল যে পণ্ডিত শব্দটোৰ সৈতে দুৰ্নীতি আৰু উৎকোচৰ সংযোগ ঘটোৱাটোৱে ব্ৰাহ্মণ সম্প্ৰদায়ৰ সুনামৰ ক্ষতি কৰিছে। তেওঁলোকৰ মতে, এনেধৰণৰ নামকৰণে সংবিধানৰ দ্বাৰা স্বীকৃত মৌলিক অধিকাৰ উলংঘা কৰাৰ লগতে সামাজিক সম্প্ৰীতিৰ ক্ষেত্ৰতো ভাবুকি কঢ়িয়াই আনিব পাৰে।

এই সমগ্ৰ বিতৰ্কৰ মাজত চিনে কৰ্মীসকলৰ সংগঠন এফ ডব্লিউ আই চি ই-য়েও তীব্ৰ প্ৰতিক্ৰিয়া ব্যক্ত কৰিছিল। সংগঠনটোৱে জনাইছিল যে জাতি বা ধৰ্মৰ ওপৰত ভিত্তি কৰি সমাজত বিভাজন সৃষ্টি কৰিব পৰা কোনো কাম চিনেমাৰ জৰিয়তে হ’ব নালাগে। তেওঁলোকে ছবিখনৰ নিৰ্মাতা নীৰজ পাণ্ডে আৰু ফ্ৰাইডে ফিল্মৱৰ্কছক ছবিখনৰ নামটো তৎক্ষণাত প্ৰত্যাহাৰ কৰিবলৈ আহ্বান জনাইছিল। তেওঁলোকৰ মতে, সামাজিক ঐক্য বজাই ৰখাৰ স্বাৰ্থত এনেধৰণৰ উচটনিমূলক শিৰোনামৰ পৰা বিৰত থকাটো উচিত।

অৱশেষত নেটফ্লিক্সে আদালতত জনাইছে যে তেওঁলোকে ছবিখনৰ শিৰোনাম সলনি কৰিবলৈ সাজু হৈছে। আবেদনকাৰীয়েও নেটফ্লিক্সৰ এই প্ৰস্তাৱত সন্মতি প্ৰকাশ কৰাৰ পিছত দিল্লী উচ্চ ন্যায়ালয়ে গোচৰটো নিষ্পত্তি কৰে। ওটিটি প্লেটফৰ্মত সৃষ্টিশীল স্বাধীনতাৰ নামত যাতে কাৰো আৱেগত আঘাত নালাগে, সেই সন্দৰ্ভতো আদালতত আলোচনা কৰা হয়। নাম সলনিৰ এই সিদ্ধান্তৰ লগে লগে ছবিখনক লৈ চলি থকা আইনী বাধাৰ অন্ত পৰিল আৰু এতিয়া ই এক নতুন পৰিচয়েৰে দৰ্শকৰ মাজলৈ আহিব।