গৌৰৱ কঢ়িয়াই আনিলে গিৰিজানন্দ চৌধুৰী বিশ্ববিদ্যালয়ে : প্লেটিনাম ছাষ্টেইনেবল কেম্পাছ স্বীকৃতি লাভ

গৱেষণা হাইটছ ফাউণ্ডেচন আৰু পৰিৱেশ সুৰক্ষা প্ৰশিক্ষণ তথা গৱেষণা প্ৰতিষ্ঠানৰ উদ্যোগত শেহতীয়াকৈ অনুষ্ঠিত ভাৰত এনভাইৰনমেণ্ট প্ৰগ্ৰেমৰ অধীনত অসমৰ গিৰিজানন্দ চৌধুৰী বিশ্ববিদ্যালয়ে এক বিশেষ সন্মান লাভ কৰিছে। ২০২৬ বৰ্ষৰ ভাৰত ছাষ্টেইনেবিলিটি কেম্পাছ মিছনৰ অংশ হিচাপে বিশ্ববিদ্যালয়খনক প্লেটিনাম ছাষ্টেইনেবল কেম্পাছ হিচাপে স্বীকৃতি প্ৰদান কৰা হৈছে। যোৱা ২২ এপ্ৰিলৰ পৰা ২৯ এপ্ৰিললৈ অনুষ্ঠিত হোৱা পৃথিৱী সপ্তাহৰ বিশেষ কাৰ্যসূচীৰ মাজতে এই গুৰুত্বপূৰ্ণ ঘোষণা কৰা হয়।

পৰিৱেশ সুৰক্ষা আৰু বহনক্ষম উন্নয়নৰ প্ৰতি বিশ্ববিদ্যালয়খনে আগবঢ়োৱা নিৰন্তৰ সেৱা আৰু সজাগতাৰ শলাগ লৈ এই বঁটা আগবঢ়োৱা হৈছে। কেম্পাছৰ ভিতৰত অনুকূল পৰিৱেশ গঢ়ি তোলাৰ লগতে শিক্ষাৰ্থীসকলৰ মাজত প্ৰকৃতিপ্ৰেম বৃদ্ধি কৰাৰ ক্ষেত্ৰত প্ৰতিষ্ঠানটোৱে বিশেষ ভূমিকা পালন কৰিছে। এই স্বীকৃতিয়ে বিশ্ববিদ্যালয়খনৰ প্ৰকৃতি সংৰক্ষণৰ প্ৰতি থকা দায়বদ্ধতাক নতুন মাত্ৰা প্ৰদান কৰিছে।

পৃথিৱী সপ্তাহ উদযাপনৰ অংশ হিচাপে গিৰিজানন্দ চৌধুৰী বিশ্ববিদ্যালয়ত বিভিন্ন ধৰণৰ কাৰ্যসূচী ৰূপায়ণ কৰা হৈছিল। ইয়াৰ ভিতৰত বৃক্ষৰোপণ অভিযান, প্লাষ্টিক মুক্ত অভিযান, বহনক্ষমতা সন্দৰ্ভত সজাগতা সভা আৰু ছাত্ৰ-ছাত্ৰীসকলৰ মাজত বিভিন্ন প্ৰতিযোগিতা অনুষ্ঠিত কৰা হয়। কেৱল চৌহদৰ ভিতৰতে আবদ্ধ নাথাকি বিশ্ববিদ্যালয়খনে জনসাধাৰণৰ মাজতো পৰিৱেশ সজাগতা সৃষ্টিৰ বাবে কেইবাটাও জনসম্পৰ্কীয় কাৰ্যসূচী হাতত লৈছিল।

এই সাফল্যৰ পিছত বিশ্ববিদ্যালয় কৰ্তৃপক্ষই গৱেষণা হাইটছ ফাউণ্ডেচন আৰু ই পি টি আৰ আইক আন্তৰিক ধন্যবাদ জ্ঞাপন কৰিছে। প্ৰতিষ্ঠানটোৰ তৰফৰ পৰা জনোৱা হৈছে যে এই কামসমূহ সফল কৰি তোলাত ৰাষ্ট্ৰীয় সেৱা আঁচনিৰ স্বেচ্ছাসেৱকসকল আৰু আয়োজক সমিতিয়ে বিশেষ পৰিশ্ৰম কৰিছিল। আগন্তুক দিনত গ্ৰীণ কেম্পাছ বা সেউজ চৌহদ গঢ়ি তোলাৰ লক্ষ্যৰে বিশ্ববিদ্যালয়খনে এনেধৰণৰ জনহিতকৰ কাম অব্যাহত ৰাখিব বুলি প্ৰকাশ কৰিছে।