গৰু বিহুৰ দিনাই অঘটন! গোৱালপাৰাৰ কৃষ্ণাই নদীত সলিল সমাধি দুই যমজ ভাতৃৰ

ৰাজ্যজুৰি গৰু বিহুৰ আনন্দ-উছাহ চলি থকাৰ মাজতেই আজি গোৱালপাৰা জিলাত এক শোকাবহ ঘটনা সংঘটিত হয়। জিলাখনৰ কৃষ্ণাইৰ ভোজমালা অঞ্চলত গৰু বিহুৰ পৰম্পৰা ৰক্ষা কৰি নদীত গৰু ধুৱাবলৈ গৈ দীপাংকৰ নাথ আৰু দেবাশিষ নাথ নামৰ দুজন কিশোৰ যমজ ভাতৃৰ সলিল সমাধি ঘটে। নৱম শ্ৰেণীত অধ্যয়নৰত এই দুয়োগৰাকী কিশোৰ টেঙাবাৰী গাঁৱৰ বাসিন্দা আছিল। বিহুৰ আনন্দৰ মাজতে সংঘটিত হোৱা এই দুৰ্ভাগ্যজনক ঘটনাই সমগ্ৰ অঞ্চলটোৰ উৎসৱমুখৰ পৰিৱেশ ম্লান পেলোৱাৰ লগতে স্থানীয় ৰাইজৰ মাজত গভীৰ শোকৰ ছাঁ পেলাইছে।

প্ৰাপ্ত তথ্য অনুসৰি, আজি পুৱা গৰু বিহুৰ নীতি-নিয়ম পালন কৰাৰ উদ্দেশ্যে দুই ভাতৃয়ে স্থানীয় আন লোকসকলৰ সৈতে কৃষ্ণাই নদীলৈ গৈছিল। নদীত গৰু ধুৱাই থকাৰ সময়তে হঠাতে দীপাংকৰ আৰু দেবাশিষ গভীৰ পানীৰ মাজলৈ সোমাই যায় আৰু মুহূৰ্তৰ ভিতৰতে সন্ধানহীন হৈ পৰে। লগে লগে উপস্থিত ৰাইজে কিশোৰ দুজনক উদ্ধাৰৰ বাবে চেষ্টা চলায় যদিও কোনো সুফল লাভ নকৰাত প্ৰশাসনক খবৰ দিয়ে।

ঘটনাৰ খবৰ পোৱা মাত্ৰকে ৰাজ্যিক দুৰ্যোগ সঁহাৰি নিধিৰ (SDRF) এটা দলে ঘটনাস্থলীত উপস্থিত হৈ ততাতৈয়াকৈ উদ্ধাৰ অভিযান আৰম্ভ কৰে। এছ ডি আৰ এফ বাহিনীয়ে দীঘলীয়া সময় ধৰি চলোৱা এক তীব্ৰ অভিযানৰ অন্তত নদীৰ বুকুৰ পৰা দুয়োগৰাকী যমজ ভাতৃৰ নিঠৰ দেহ উদ্ধাৰ কৰিবলৈ সক্ষম হয়। একেলগে দুটাকৈ সন্তানৰ মৃতদেহ দেখি পৰিয়ালৰ লোকসকল শোকত ভাগি পৰিছে আৰু সমগ্ৰ টেঙাবাৰী গাঁৱত এক শোকাকুল পৰিৱেশে বিৰাজ কৰিছে।