ভেটী লৈ থাকোতেই আৰক্ষীৰ জালত পৰিল গোলাঘাটৰ জিলা ক্ৰীড়া বিষয়া

পুনৰ অসম আৰক্ষীৰ জালত পৰিল আন এজন দুৰ্নীতিপৰায়ণ বিষয়া। বুধবাৰে গোলাঘাটৰ অতিৰিক্ত আৰক্ষী অধীক্ষক সুৰজিৎ সিং পানেছাৰে গোলাঘাট জিলা ক্রীড়া সন্থাৰ বিষয়া মনোৰমা দাসক ত্ৰিশ হেজাৰ টকা উৎকোচ লৈ থকাৰ সময়তে হাতে লোটে গ্ৰেপ্তাৰ কৰে।

জানিব পৰা মতে মুখ্য মন্ত্ৰী সমগ্ৰ গ্ৰাম্য উন্নয়ন যোজনাৰ অধীনত খেলপথাৰ উন্নয়নৰ বাবে ২০ লাখ টকা আবণ্টন দিয়া হৈছে।

ইয়াৰ বাবে জিলাখনৰ ঢেকিয়াল উচ্চতৰ মাধ্যমিক বিদ্যালয়ৰ খেলপথাৰৰ বাবে সন্থাই প্ৰথম কিস্তি হিচাপে ৮ লাখ টকা প্ৰদান কৰে। আৰু দ্বিতীয় কিস্তিত পাব লগীয়া ১২ লাখ টকাৰ বাবে বিদ্যালয়খনৰ অধ্যক্ষ নৃপেন চন্দ্ৰ দত্তই সন্থাক যোগাযোগ কৰাত বিষয়া মনোৰমা দাসে ৫০ হেজাৰ টকা দাবী কৰে।

অধ্যক্ষ গৰাকীয়ে এই সমগ্ৰ বিষয়টো আৰক্ষীক অৱগত কৰাত আৰক্ষীৰ দিহা অনুসৰি বুধবাৰে জিলা কাৰ্যালয়ত গৈ বিষয়া গৰাকীক ৩০ হাজাৰ টকা দিয়ে।

ইয়াৰ পিছতে আৰক্ষী অধীক্ষক গৰাকীয়ে টকাসহ বিষয়া মনোৰমা দাসক গ্ৰেপ্তাৰ কৰি গোলাঘাট থানালৈ লৈ আহে। পিছত আৰক্ষীয়ে বিষয়া গৰাকীৰ টেনপুৰস্থিত ভাৰাঘৰত তালাচী চলাই নগদ এক লাখ টকা উদ্ধাৰ কৰে।

জানিব পৰা মতে আজি ক্ৰীড়া বিষয়া গৰাকীক গুৱাহাটীৰ বিশেষ আদালতত হাজিৰ কৰোৱা হ’ব।