গোলাঘাট আৰক্ষীৰ বৃহৎ সফলতা; গ্ৰেপ্তাৰ কুখ্যাত ড্ৰাগছ মাফিয়া পাপু আলি
গোলাঘাটৰ ফৰকাটিঙৰ কুখ্যাত ড্ৰাগছ ব্যৱসায়ী পাপু আলিক গ্ৰেপ্তাৰ কৰা হৈছে।
কিছুদিন পূৰ্বে পাপু আলিৰ তিৰুৱাল বৰফুকন খাটৰ নিৰ্মিয়মান বাসগৃহৰ পৰা বুজন পৰিমাণৰ ড্ৰাগছ উদ্ধাৰ কৰিছিল আৰক্ষীয়ে।
উক্ত ঘটনাৰ পিছতে ড্ৰাগছ মাফিয়া পাপু আলি আৰক্ষীৰ চকুত ধুলি দি পলাই ফুৰিছিল।
অৱশেষত গোলাঘাটৰ ফৰকাটিং আৰক্ষীয়ে ফৰকাটিং অঞ্চলৰ পৰাই ড্ৰাগছ মাফিয়া পাপু আলিক গ্ৰেপ্তাৰ কৰিবলৈ সক্ষম হয়।
উল্লেখযোগ্য যে পাপু আলি ড্ৰাগছৰ লগতে আন বহুতো অপৰাধমূলক কাৰ্যৰ লগতো জড়িত আছিল।
অগাধ ধন-সম্পত্তিৰ মালিক এই পাপু আলিৰ বাসগৃহত ২০১৯ চনৰ ২৬ ছেপ্টেম্বৰত অভিযান চলাই ঘৰৰ বিভিন্ন স্থানৰ পৰা পিষ্টল, গ্ৰেণেড, সেনাৰ পোছাক আদি উদ্ধাৰ কৰিছিল আৰক্ষীয়ে।
গোলাঘাট জিলাৰ বিভিন্ন এলেকাৰ লগতে অন্য জিলালৈও ড্ৰাগছৰ ৰমৰমীয়া বেহা চলাই অহাৰ অভিযোগ আছে পাপু আলিৰ বিৰুদ্ধে।
স্থানীয় লোকৰ ভাষ্য অনুসৰি এনে অসাধু ব্যৱসায় কৰিয়েই পাপু আলিয়ে গোটাইছিল অজস্ৰ ধন-সম্পত্তি। দেওবাৰে এই কুখ্যাত ড্ৰাগছ মাফিয়াৰ গ্ৰেপ্তাৰত সন্তোষ প্ৰকাশ কৰিছে গোলাঘাটবাসীয়ে।