চৰকাৰী কৰ্মচাৰীৰ বাবে সুখবৰ : ২০১৯-২০ৰ PLB বানচত কেন্দ্ৰীয় কেবিনেটৰ অনুমোদন
ক’ৰ’ণাকালৰ পূজাৰ বতৰতে চৰকাৰী কৰ্মচাৰীৰ বাবে আহিছে এক সুখবৰ।
চৰকাৰী কৰ্মচাৰীৰ ২০১৯-২০ বৰ্ষৰ প্ৰডাক্টিভিটি লিংকেড বানচত অনুমোদন জনাইছে কেন্দ্ৰীয় কেবিনেটে। আজি এই কথা ঘোষণা কৰে কেন্দ্ৰীয় মন্ত্ৰী প্ৰকাশ জাভেদকাৰে।
প্ৰধানমন্ত্ৰী নৰেন্দ্ৰ মোদীৰ অধ্যক্ষতাত আজি অনুষ্ঠিত কেন্দ্ৰীয় কেবিনেট বৈঠকৰ পাছত এই কথা ঘোষণা কৰি কেন্দ্ৰীয় মন্ত্ৰী জাভেদকাৰে কয় যে, প্ৰায় ৩০ লাখ চৰকাৰী কৰ্মচাৰী ইয়াৰ দ্বাৰা উপকৃত হ’ব।
মন্ত্ৰী গৰাকীৰ মতে ১৬.৯৭ লাখ নন-গেজেটেড কৰ্মচাৰী (বাণিজ্যিক প্ৰতিষ্ঠান) অৰ্থাৎ ৰে’লৱে, ডাক বিভাগ, প্ৰতিৰক্ষা, EPFO, ESIC আদিত কৰ্মৰত কৰ্মচাৰীয়ে এই বানচ লাভ কৰিব।
আনহাতে ১৩.৭০ লাখ নন-গেজেটেড কেন্দ্ৰীয় চৰকাৰৰ কৰ্মচাৰীয়ে এই বানচ লাভ কৰিব বুলি মন্ত্ৰী জাভেদকাৰে সংবাদ মাধ্যমৰ আগত প্ৰকাশ কৰে।
এই বাচনৰ বাবে কেন্দ্ৰীয় কেবিনেটে ৰাজকোষৰ পৰা ৩,৭৩৭ কোটি টকা মোকলাই দিবলৈ সিদ্ধান্ত লোৱা বুলি জানিব পৰা গৈছে।
এটা কিস্তিত দিবলগীয়া কৰ্মচাৰীসকলৰ এই বানচ আগন্তুক দুৰ্গা পূজাৰ বিজয়া দশমীৰ পূৰ্বে দিয়া হ’ব বুলিও মন্ত্ৰী গৰাকীয়ে উল্লেখ কৰে।