অসম অলিম্পিক সন্থাৰ জৰিয়তে গ্ৰাম্য পৰ্যায়ত অলিম্পিক আয়োজনৰ বাবে ৰাজ্য চৰকাৰে সিদ্ধান্ত গ্ৰহণ কৰিছে : মুখ্য মন্ত্ৰী সোণোৱাল
মাজুলীৰ ক্ৰীড়াখণ্ডক এক নতুন গতি প্ৰদানেৰে মুখ্য মন্ত্ৰী সৰ্বানন্দ সোণোৱলে আজি ‘মুখ্য মন্ত্ৰী সমগ্ৰ গ্ৰাম্য উন্নয়ন যোজনা’ৰ অধীনত মাজুলীৰ মধ্য ইংৰাজী পাৰিজাত উচ্চমাধ্যমিক বিদ্যালয়, ৰতনপুৰ মিৰি উচ্চমাধ্যমিক বিদ্যালয় আৰু চেলেক জনজাতি উচ্চমাধ্যমিক বিদ্যালয়ৰ খেল পথাৰৰ উন্নয়নৰ আধাৰশিলা স্থাপন কৰে।
এই খেলপথাৰ কেইখনৰ বাবে ৰাজ্য চৰকাৰৰ ক্ৰীড়া বিভাগে প্ৰত্যকলৈ আগবঢ়োৱা ২০ লাখ টকা অনুদানৰ আৱণ্টন পত্ৰ আজি শিক্ষানুষ্ঠান কেইখনৰ কৰ্তৃপক্ষক মুখ্য মন্ত্ৰীয়ে আনুষ্ঠানিকভাৱে অৰ্পন কৰে।
তদুপৰি, একেটা অনুষ্ঠানতে সোণোৱালে সমন্বিত জনজাতি উন্নয়ন প্ৰকল্পৰ অধীনত জিলাখনৰ হিতাধিকাৰীসকলৰ মাজত পাৱাৰ টিলাৰ, টিনপাত আৰু সৌৰ চাকি বিতৰণ প্ৰক্ৰিয়াৰ শুভাৰম্ভ কৰে।
মধ্য মাজুলী পাৰিজাত উচ্চমাধ্যমিক বিদ্যালয়ত অনুষ্ঠিত এই কাৰ্য্যসূচীত ভাষণ প্ৰদান কৰি মুখ্য মন্ত্ৰীয়ে কয় যে ক্ৰীড়াৰ জৰিয়তে সমাজখনক আগুৱাই নিব লাগিব।
সমাজ উন্নয়নৰ দিশত ক্ৰীড়াৰ সাৰ্বজননীন ভূমিকা আছে বুলি সোণোৱালে মন্তব্য কৰি আমাৰ উঠি অহা প্ৰজন্মক ক্ৰীড়াৰ দ্বাৰা আদৰ্শ নাগৰিক হিচাপে গঢ়ি তুলিব লাগিব বুলিও কয়।
যুৱ বিকাশ মিছনৰ অধীনত ৰাজ্য চৰকাৰে ৫০০ খন খেলপথাৰ উন্নীতকৰণৰ সিদ্ধান্ত লৈছে বুলি মুখ্য মন্ত্ৰীয়ে কয় যে ইয়াৰ অধীনত মাজুলী জিলাৰ ৯ খন বিদ্যালয়লৈ খেল পথাৰ উন্নীতকৰণৰ বাবে ইতিমধ্যে অনুদান আগবঢ়োৱা হৈছে।
নিজৰ ভাষণত মুখ্য মন্ত্ৰীয়ে অসম অলিম্পিক সন্থাৰ জৰিয়তে গ্ৰাম্য পৰ্যায়ত অলিম্পিক আয়োজনৰ বাবে ৰাজ্য চৰকাৰে সিদ্ধান্ত গ্ৰহণ কৰিছে বুলি মত প্ৰকাশ কৰে।