চৰকাৰে বৃদ্ধি কৰিলে হাইড্ৰক্সিক্লৰ’কুইন ব্যৱহাৰৰ পৰিসৰ; কোনে কোনে কৰিব পাৰে ব্যৱহাৰ?

হাইড্ৰক্সিক্লৰ’কুইনৰ ওপৰত ভাৰত চৰকাৰ আস্থা অটুট আছে। ভাৰতত স্বাস্থ্যকৰ্মীসকলৰ কৰ’নাৰ পৰা ৰক্ষা পোৱাৰ বাবে হাইড্ৰক্সিক্লৰ’কুইন ব্যৱহাৰ কৰাৰ অনুমতি আছে।

এতিয়া চৰকাৰে হাইড্ৰক্সিক্লৰ’কুইনৰ ব্যৱহাৰৰ পৰিসৰ বৃদ্ধি কৰি দিছে।

কেন্দ্ৰীয় স্বাস্থ্য মন্ত্ৰ্যালয়ে শুকুৰবাৰে জাৰি কৰা এক পৰামৰ্শাৱলীত এতিয়া লক্ষণবিহীন স্বাস্থ্যসেৱা তথা প্ৰথমশাৰীৰ কৰ্মীসকলকো হাইড্ৰক্সিক্লৰ’কুইন ল’বলৈ কোৱা হৈছে।

চৰকাৰে এইমছৰ ফালৰ পৰা কোভিড-১৯ৰ বাবে গঠন কৰা নেশ্যনেল টাস্ক ফ’ৰ্চৰ দ্বাৰা হাইড্ৰক্সিক্লৰ’কুইনৰ সুৰক্ষিত ব্যৱহাৰৰ ফলাফলৰ সমীক্ষাৰ পাছত এই সিদ্ধান্ত গ্ৰহণ কৰা হয়।

চৰকাৰৰ সংশোধিত পৰামৰ্শাৱলী অনুসৰি কোভিড-১৯ হাস্পাতলৰ বাহিৰৰ হাস্পাতলত কাম কৰা লক্ষণবিহীন স্বাস্থ্যকৰ্মী, কন্টেইমেন্ট জ’নত নিৰীক্ষণত নিযুক্ত প্ৰথমশাৰীৰ কৰ্মীসকল আৰু কৰ’না ভাইৰাছ সংক্ৰমণৰ সৈতে জড়িত হৈ থকা আৰক্ষী তথা অৰ্দ্ধসামৰিক লোকসকলকো হাইড্ৰক্সিক্লৰ’কুইন দৰৱ ল’বলৈ পৰামৰ্শ দিয়া হৈছে।

আইচিএমআৰে এই সংশোধিত পৰামৰ্শাৱলী জাৰি কৰিছে।

অৱশ্যে, দৰৱ সেৱনৰ ফলত মিছাতেই সুৰক্ষাৰ ভাৱনা সৃষ্টি হোৱা উচিত নহয় বুলিও কোৱা হৈছে।

এই পৰামৰ্শাৱলী অনুসৰি, কৰ’না প্ৰভাৱিত তথা কৰ’না প্ৰভাৱৰ বাহিৰত থকা অঞ্চলত কাম কৰি থকা সকলো স্বাস্থ্যকৰ্মীকে এই দৰৱ ব্যৱহাৰ কৰাৰ পৰামৰ্শ দিয়া হৈছে।

উল্লেখযোগ্য যে শুকুৰবাৰে মেডিকেল জাৰ্ণেল লেনচেটে দাবী কৰিছিল যে কোভিড-১৯ ৰোগীক হাইড্ৰক্সিক্লৰ’কুইন দৰৱ দিলে তাৰ নিশ্চিত ফলাফল লাভৰ কোনো প্ৰমান নাই।