নৰ্থ ইষ্ট নাওৰ সাংবাদিক কল্পজ্যোতি শইকীয়ালৈ ‘সাহসী’ৰ ২০২০ বৰ্ষৰ ‘সাহসিকতা’ বঁটা
নৰ্থ ইষ্ট নাওৰ সাংবাদিক কল্পজ্যোতি শইকীয়ালৈ বে-চৰকাৰী সংস্থা সাহসীৰ ২০২০ বৰ্ষৰ সাহসিকতা বঁটা ঘোষণা কৰা হৈছে।
কল্পজ্যোতিৰ লগতে নিউজ-১৮ অসম নৰ্থষ্টৰ জ্যেষ্ঠ সাংবাদিক বিপুল বৰ্মণ, আছাম টকছৰ কাৰ্যবাহী সম্পাদক দেৱজিৎ তালুকদাৰ, ডি-ৱাই-৩৬৫ৰ সাংবাদিক ধীৰাজ হাজৰিকা, প্ৰাগ নিউজৰ সাংবাদিক গৌতম গগৈ আৰু উৎপল বৰালৈ এই সাহসিকতা বঁটা ঘোষণা কৰা হৈছে।
ইয়াৰোপৰি, জখলাবন্ধা আৰক্ষী থানাৰ ভাৰপ্ৰাপ্ত আৰক্ষী বিষয়া নিপু কলিতালৈও এই সন্মান আগবঢ়োৱা হ’ব।
এক বিজ্ঞপ্তিযোগে এই কথা জানিবলৈ দিয়ে সাহসীৰ সভানেত্ৰী তৃষ্ণা নাথে।
ইয়াৰোপৰি সমাজৰ বিভিন্ন ক্ষেত্রৰ সৈতে জড়িত হৈ সমাজ জীৱনৰ হৈতে কাম কৰি থকা বিশেষ তিনিজন ব্যক্তিক এই অনুষ্ঠানত বিশেষভাৱে সন্মানিত কৰা হ’ব বুলি তেওঁ বিজ্ঞপ্তিত জনায়।
এই অনুষ্ঠানত বটাঁপ্ৰাপকসকলক বঁটা প্ৰদান কৰিব বিশিষ্ট সমাজকৰ্মী মুকুল শইকীয়া, অসমৰ বিশিষ্ট সাংবাদিক প্ৰণয় বৰদলৈ আৰু অসমৰ মফচলীয় সাংবাদিক সকলৰ একমাত্র উমৈহতীয়া মঞ্চ আপকুৰ কেন্দ্রীয় সমিতিৰ সভাপতি মনোজ কুমাৰ সিঙে।
গুৱাহাটীৰ অসম সাহিত্য সভা ভৱনত অহা ২৯ নবেম্বৰত আয়োজিত হ’ব এই বঁটা প্ৰদান অনুষ্ঠান।
সাহসী হৈছে অসমৰ এগৰাকী লাঞ্চিতা, বঞ্চিতা আৰু নিৰ্যাতিতা মহিলাৰ উদ্যোগত ২০১৭ বৰ্ষত জন্ম লাভ কৰা বে-চৰকাৰী স্বেচ্ছাসেৱী সংস্থা।
যি সাহসী ৰ লক্ষ্য কেৱল সমাজত নিৰ্যাতিতা আৰু আৰ্তজনৰ কাষত থাকি নিৰ্যাতনকাৰীক আইনৰ জৰিয়তে শাস্তি প্রদান কৰা, দুখীয়া দৰিদ্ৰ জনৰ কাষত ঠিয় হৈ তাৎক্ষণিকভাৱে সহায়ৰ হাত আগবঢ়োৱা, মেধা দৰিদ্ৰ ছাত্র-ছাত্ৰীক আৰ্থিক সহায়ৰ হাত আগবঢ়োৱা আদি কাম কৰাই সংস্থাটোৰ মূল লক্ষ্য।
ইয়াৰ মাজতে সাহসী-এ বিগত সময়ত অতি সাহসিকতাৰে অসমৰ সমাজ জীৱনলৈ কাম কৰি অহা ব্যক্তিসকলৰ ভিতৰৰ নিৰ্বাচিত ১০ জন বিভিন্ন ক্ষেত্রৰ হৈতে জড়িত লোকক সাহসিকতা বঁটা প্ৰদান কৰি আহিছে বুলি তৃষ্ণাই জানিবলৈ দিয়ে।