গুৱাহাটীত IED উদ্ধাৰ সম্পৰ্কত কি মন্তব্য মহানগৰ আৰক্ষী আয়ুক্তৰ?

গুৱাহাটী মহানগৰীত বুধবাৰে নিশা দুটাকৈ IED উদ্ধাৰ হোৱাৰ পিছতে তথা প্ৰধান মন্ত্ৰীৰ অসম ভ্ৰমণৰ পূৰ্বে মহানগৰীৰ নিৰাপত্তা ব্যৱস্থা অধিক কটকটীয়া কৰি তোলা হৈছে বুলি জানিবলৈ দিয়ে মহানগৰ আৰক্ষী আয়ুক্ত মুন্না প্ৰসাদ গুপ্তাই।

কালি উদ্ধাৰ হোৱা IED দুটাৰ সম্পৰ্কে সোধা-পোচাৰ বাবে বৰ্তমান পেঙেৰি আৰক্ষীৰ কবলত থকা আলফা কেডাৰ ৰক্তিম গগৈক গুৱাহাটীলৈ অনাৰ সম্ভাৱনা আছে বুলি তেওঁ জনায়।

আৰক্ষী আয়ুক্ত গৰাকীয়ে জনোৱা মতে পেঙেৰি আৰক্ষীৰ আগত আলফা কেডাৰ ৰক্তিম গগৈয়ে স্বীকাৰোক্তিৰ ভিত্তিত বুধবাৰে মহানগৰ আৰক্ষীয়ে IED দুটা উদ্ধাৰ কৰিবলৈ সক্ষম হৈছিল।

তেওঁ কয়, পেঙেৰি আৰক্ষীৰ পৰা ‘আমি খবৰ লাভ কৰিছিলো দুটা স্থানত আই ডি ৰখাৰ কথা। সেই অনুসৰি আমি কালি নিশা অভিযান চলাই দুটাকৈ IED লাভ কৰিছিলো।’

‘১ ফেব্ৰুৱাৰীত IED কেইটা উক্ত স্থান দুটাত ৰখা হৈছিল’ তেওঁ লগতে কয়।

আনহাতে নৰেন্দ্ৰ মোদীৰ অসম ভ্ৰমণৰ বাবে মহানগৰীত কটকটীয়া নিৰপত্তা ব্যৱস্থা গঢ়ি তোলা হৈছে বুলি উল্লেখ কৰি তেওঁ কয়, ‘মহানগৰীৰ প্ৰায় সংখ্যক চি চি টিভি ঠিকেই আছে, যি বোৰ বেয়া হৈ আছে সেইবোৰ মেৰামতি কৰা হ’ব।’

ইফালে চার্জিল ইমামক গুৱাহাটীলৈ অনা হ’ব বুলি জানিবলৈ দি তেওঁ কয়, ‘মহানগৰ আৰক্ষীৰ দল এটা বৰ্তমান নতুন দিল্লীত বাহৰ পাতি আছে। দিল্লী আৰক্ষীৰ জিম্মা শেষ হ’লেই গুৱাহাটীলৈ অনা হব চাৰ্জিল ইমামক।’