এনডিএফবি (প্ৰ)ৰ সৈতে হ’বলগীয়া কেন্দ্ৰৰ আলোচনাক ‘টাইম পাছ’ আখ্যা হাগ্ৰামাৰ
বিটিচি প্ৰধান হাগ্ৰামা মহিলাৰীয়ে মঙলবাৰে তেওঁৰ স্বভাৱসুলভ ভংগীমাৰে সংবাদ মাধ্যমৰ আগত কেতবোৰ মন্তৱ্য কৰিছে। পৃথক বড়ো ৰাজ্যৰ পৰিৱৰ্তে কেন্দ্ৰীয় শাসিত পৰিষদ গঠনৰ চৰ্চাক লৈ ৰাজ্যত পুনৰ পৰিস্থিতি উত্তপ্ত হৈ উঠাৰ সময়তে হাগ্ৰামাই সংবাদ মাধ্যমৰ আগত কেতবোৰ আমোদজনক মন্তৱ্য কৰে।
হাগ্ৰামাই ডিচেম্বৰত এনডিএফবি(প্ৰ)ৰ সৈতে কেন্দ্ৰৰ পুনৰ অনুষ্ঠিত হ’বলগীয়া আলোচনাক মাত্ৰ ‘টাইম পাছ’ৰ বাবেহে অনুষ্ঠিত হ’ব বুলি মন্তৱ্য কৰে।
আনহাতে, সোমবাৰে নতুন দিল্লীত অনুষ্ঠিত হোৱা আলোচনা এনডিএফবি(প্ৰ)ৰ যুদ্ধবিৰতিৰ ম্যাদ বৃদ্ধিৰ সন্দৰ্ভতহে অনুষ্ঠিত হৈছিল আৰু কেন্দ্ৰীয় শাসিত পৰিষদ গঠনৰ আলোচনাৰ বাবে হোৱা নাছিল বুলি মন্তৱ্য কৰি ‘ইউটিচি’ সম্পৰ্কত তেওঁ কোনো বাতৰি চোৱা নাই বুলিও কয়।
কেন্দ্ৰীয় শাসিত পৰিষদ গঠনৰ বাতৰিক গুৰুত্বহীন বুলি হাগ্ৰামাই মন্তৱ্য কৰা সোমবাৰৰ আলোচনাত এনডিএফবি(প্ৰ)ৰ নেতৃবৰ্গৰ সৈতে এবছুৰ লগতে আন দল-সংগঠনৰ নেতাও উপস্থিত আছিল।
উল্লেখ্যোগ্য যে, সোমবাৰে নতুন দিল্লীত এনডিএফবি(প্ৰ) ,এবছুৰ নেতৃবৰ্গ আৰু পিজেএচিএমৰ নেতৃবৰ্গৰ সৈতে কেন্দ্ৰীয় চৰকাৰৰ গৃহমন্ত্ৰী ৰাজনাথ সিঙৰ এখন বৈঠক অনুষ্ঠিত হৈছিল। উক্ত বৈঠকতে অহা ডিচেম্বৰত বড়োলেণ্ড বিষয়ত পুনৰ আলোচনা অনুষ্ঠিত কৰাৰ সিদ্ধান্ত গ্ৰহণ কৰা হৈছিল আৰু এক প্ৰেছ বিবৃতিত এবছুৱে সেয়া সদৰী কৰিছিল।
তদুপৰি, এবছুৰ সভাপতি প্ৰমোদ বড়োৱে উক্ত আলোচনাত কেন্দ্ৰীয় শাসিত পৰিষদ গঠন সন্দৰ্ভত কোনো আলোচনা হোৱাৰ কথা অস্বীকাৰ কৰাৰ লগতে নাগৰিকত্ব সংশোধনী বিধেয়কৰ পৰা ৰাইজৰ মনোযোগ অঁতৰাই নিয়াৰ কৌশল হিচাপে ইয়াক এক অপপ্ৰচাৰ বুলি অভিহিত কৰিছিল।