চ’ছিয়েল মিডিয়াত ৫০ৰো অধিক যুৱতীক যৌন উৎপীড়ন! : আৰক্ষীৰ জালত ১৯ বছৰীয়া যুৱক

সামাজিক মাধ্যমত ৫০ গৰাকীৰো অধিক যুৱতীক হাৰাশাস্তি কৰি বুধবাৰে আৰক্ষীৰ হাতত গ্ৰেপ্তাৰ হৈছে হাৰিয়ানাৰ এজন যুৱক।

আৰক্ষীয়ে প্ৰকাশ কৰা অনুসৰি চ’ছিয়েল মিডিয়াৰ প্লেটফৰ্মত ভুৱা পৰিচয়েৰে ৫০ ৰো অধিক যুৱতী আৰু মহিলাক যৌন উৎপীড়ন চলোৱা অভিযোগত ফৰিদাবাদৰ পৰা এজন ১৯ বছৰীয়া যুৱকক আৰক্ষীয়ে গ্ৰেপ্তাৰ কৰিছে।

ৰহিম খান নামৰ অষ্টম শ্ৰেণীলৈকে অধ্যয়ন কৰা ১৯ বছৰীয়া অভিযুক্ত যৱকজনে বিভিন্ন এপৰ যোগেদি মোবাইলত ফ’টো ম’ৰ্পিং কৰি যুৱতী-মহিলাক হাৰাশাস্তি কৰি আহিছিল।

আৰক্ষীৰ মতে অভিযুক্ত যুৱকজনে মহিলাৰ ভুৱা পৰিচয়েৰে ৫০ গৰাকীৰো অধিক যুৱতী আৰু মহিলাক চ’ছিয়েল মিডিয়াৰ বিভিন্ন ফ্লেটফৰ্মত যৌনগন্ধী মেচেজ প্ৰদানেৰে একপ্ৰকাৰৰ উৎপীড়ন চলাই আহিছিল।

যোৱা মংগলবাৰে এগৰাকী ভুক্তভোগীয়ে আৰপি আৰক্ষী থানাত এজন অচিনাক্ত ব্যক্তিয়ে তেওঁলৈ এটা ইনষ্টাগ্ৰাম একাউন্টৰ পৰা এডিট কৰা অশ্লীল ফ’টো প্ৰেৰণ কৰা বুলি এখন এজাহাৰ দাখিল কৰে।

উক্ত এজাহাৰৰ ভিত্তিতে আৰক্ষীয়ে অনুসন্ধান চলাই “ch_rahim_khan786” নামৰ ইনষ্টাগ্ৰামৰ গৰাকীজনক গ্ৰেপ্তাৰ কৰে।

আৰক্ষীয়ে যুৱকজনৰ মোবাইলটো জব্দ কৰিছে। মোবাইলটোৰ চাটবক্সত আপত্তিজনক মেচেজ, ভিডিঅ’ আৰু ফ’টোসহ যুৱকজনৰ বিৰুদ্ধে উঠা অভিযোগৰ যথেষ্ট পৰিমাণৰ তথ্য প্ৰমাণ আছে বুলি আৰক্ষীয়ে সদৰী কৰিছে।