আই এছ এলৰ বাবে য়ুৰোপিয়ান শৈলীৰ প্ৰশিক্ষণেৰে সাজু নৰ্থ ইষ্ট য়ুনাইটেড : মুখ্য প্ৰশিক্ষক ৰবাৰ্ট জৰ্নি

শুকুৰবাৰে গুৱাহাটী প্ৰেছ ক্লাৱত অনুষ্ঠিত এখন সংবাদমেলত অংশগ্ৰহণ কৰি নৰ্থ-ইষ্ট য়ুনাইটেডৰ মুখ্য প্ৰশিক্ষক ৰবাৰ্ট জৰ্নিয়ে ইণ্ডিয়ান ছুপাৰ লীগৰ ষষ্ঠ সংস্কৰণৰ বাবে নৰ্থ-ইষ্ট য়ুনাইটেড সাজু বুলি মন্তব্য কৰে।

বিগত বৰ্ষৰ তুলনাত এইবাৰ নৰ্থ-ইষ্ট য়ুনাইটেডে অধিক সফলতা লাভ কৰিব বুলি আশাবাদী হৈ থকা প্ৰশিক্ষকগৰাকীয়ে ইতিমধ্যে বিগত সপ্তাহৰ পৰা সৰুসজাই ষ্টেডিয়ামত দলটোৱে পূৰ্ণদ্যমে প্ৰশিক্ষণ চলাই আছে বুলি উল্লেখ কৰে।

আনহাতে, বিগত বৰ্ষত ছেমি ফাইনেলত উপনীত হোৱা নৰ্থ-ইষ্ট য়ুনাইটেডে শেষৰ ফালে কিছু আত্মবিশ্বাসৰ অভাৱত ভোগা বাবেই ফাইনেল খেলাৰ পৰা বঞ্চিত হ’বলগীয়া হল বুলি উল্লেখ কৰি প্ৰশিক্ষকগৰাকীয়ে এইবাৰ যাতে দলটোৱে অধিক আত্মবিশ্বাসেৰে খেলত অৱতীৰ্ণ হ’ব পাৰে তাৰবাবে খেলুৱৈসকলক সাজু কৰা হৈছে বুলি কয়।

চলিত বৰ্ষত উৰুগুৱেৰ ২১ বছৰীয়া ষ্ট্ৰাইকাৰ মাৰ্টিন চেভেছ নৰ্থ-ইষ্ট য়ুনাইটেডৰ সৈতে চুক্তিবদ্ধ হৈছে।

উৰুগুৱেৰ তাৰকা খেলুৱৈগৰাকীৰ উপৰিও উত্তৰ-পূবৰ চাৰিগৰাকীয়ে খেলুৱৈয়ে এইবাৰ নৰ্থ-ইষ্ট য়ুনাইটেডত স্থান লাভ কৰিছে।

দলত স্থান পোৱা উত্তৰ-পূবৰ খেলুৱৈ কেইগৰাকী হ’ল- অসমৰ ৰাকেশ প্ৰধান, ছিকিমৰ নিম দৰ্জী, মণিপুৰৰ নিনথয় মিটেয় আৰু মিজোৰামৰ লালেংমাও।

সংবাদ মেলখত উপস্থিত থাকি অসমৰ খেলুৱৈ ৰাকেশ প্ৰধানে মুখ্য প্ৰশিক্ষক ৰবাৰ্ট জৰ্নিৰ পৰা য়ুৰোপিয়ান ফুটবল শৈলীৰ বিষয়ে প্ৰশিক্ষণ লাভ কৰাৰ লগতে এই কৌশল প্ৰয়োগ কৰি বিপক্ষক সলঠেকত পেলাবলৈ সক্ষম হ’ব বুলি কয়।

উল্লেখযোগ্য যে, নৰ্থ ইষ্ট য়ুনাইটেডে ২১ অক্টোবৰত বাংগালুৰু এফ চিৰ বিৰুদ্ধে প্ৰথমখন খেলত অৱতীৰ্ণ হ’ব যদিও ঘৰৰ মাটিত ২৬ অক্টোবৰতহে দিল্লী ডাইনামোজৰ বিৰুদ্ধে প্ৰথমখন খেল খেলিব।

সংবাদ মেলখনত মুখ্য প্ৰশিক্ষক ৰবাৰ্ট জৰ্নি আৰু ৰাকেশ প্ৰধানৰ উপৰিও সহকাৰী প্ৰশিক্ষক ছাছা গালাভাচ, খলিদ জামিলৰ লগতে ষষ্ঠ সংস্কৰণত নৰ্থ ইষ্ট য়ুনাইটেডৰ হৈ খেলিবলগীয়া মিজোৰামৰ তাৰকা খেলুৱৈ লালেংমাও উপস্থিত থাকে।