অসুস্থ হৈ পৰিছে গোলাঘাট কাৰাগাৰৰ ভিতৰতে নাগৰিকত্ব বিধেয়কৰ বিৰুদ্ধে অনশনত বহা ছাত্ৰ নেতাকেইজন
নাগৰিকত্ব সংশোধনী বিধেয়ক ২০১৬ বাতিলৰ দাবীত যোৱা ১১ জানুৱাৰিৰ পৰা গোলাঘাটৰ কাৰাগাৰৰ ভিতৰতে আমৰণ অনশন কাৰ্যসূচী গ্ৰহণ কৰা ছাত্ৰ নেতা তিনিজনৰ স্বাস্থ্যৰ গুৰুতৰ অৱনতি ঘটা বুলি জানিব পৰা গৈছে। অনশনৰত নেতা কেইজন অসুস্থ হৈ পৰাত আজি কাৰাগাৰ কৰ্তৃপক্ষই তিনিওজনকে স্বাস্থ্য পৰীক্ষাৰ বাবে গোলাঘাট অসামৰিক চিকিৎসালয়লৈ লৈ যায়।
চিকিৎসালয় চৌহদত সাংবাদিকৰ সৈতে হোৱা কথা বতৰাত অনশনৰত এজন ছাত্ৰ নেতাই কয়, ‘নাগৰিকত্ব বিধেয়কৰ বিৰুদ্ধে সমগ্ৰ ৰাজ্যবাসী ৰাজপথলৈ ওলাই আহিব লাগে। আমি নমৰালৈকে এই বিধেয়কৰ বিৰুদ্ধে অনশন কৰি যাম’।
‘অসমীয়াৰ অস্তিত্ব ৰক্ষাৰ বাবে আমি চহিদ হ’বলৈ সাজু হৈছো। যিকোনো প্ৰকাৰে এই জাতিধ্বংসী বিধেয়কখন বাতিল কৰাৰ বাবে আমি অসম চৰকাৰ আৰু কেন্দ্ৰীয় চৰকাৰক দাবী জনাইছো’। এইবুলিও কয় ছাত্ৰ নেতাজনে।
উল্লেখযোগ্য যে নাগৰিকত্ব বিধেয়ক বাতিলৰ দাবীত যোৱা ৮ জানুৱাৰিত ছাত্ৰ সন্থাই আহ্বান জনোৱা অসম বন্ধৰ সময়ত বিজেপিৰ গোলাঘাট জিলা কাৰ্যালয় লণ্ডভণ্ড কৰাৰ অভিযোগত গ্ৰেপ্তাৰ হৈ কাৰাৰুদ্ধ হৈছিল সদৌ অসম চুতীয়া ছাত্ৰ সন্থাৰ কেন্দ্ৰীয় সাধাৰণ সম্পাদক মহেন বৰা, ছাত্ৰ মুক্তি সংগ্ৰাম সমিতিৰ কেন্দ্ৰীয় সম্পাদক বিদ্যুৎ শইকীয়া আৰু জাতীয়তাবাদী যুৱ পৰিষদৰ গোলাঘাট জিলা সমিতিৰ সাংগঠনিক সম্পাদক ৰাজীৱ লস্কৰ।