কোভিডৰ পৰা আৰোগ্য লাভ কৰাসকলক হালধী মিহলোৱা গাখীৰ খোৱাৰ পৰামৰ্শ স্বাস্থ্য দপ্তৰৰ,আৰু কি কি আছে নতুন নিৰ্দেশনাত?

কেন্দ্ৰীয় স্বাস্থ্য দপ্তৰে দেওবাৰে জাৰি কৰে কোভিডৰ পৰা আৰোগ্য লাভ কৰি ঘৰলৈ যোৱা লোকসকলৰ বাবে বিশেষ নিৰ্দেশনা।

স্বাস্থ্য বিভাগৰ নিৰ্দেশনাত কোভিডৰ পিছত কিদৰে সুস্থ জীৱন এটা যাপন কৰিব পাৰি সেই বিষয়ত এলানি পৰামৰ্শ তথা বিধান সন্নিবিষ্ট কৰা হৈছে।

কোভিড মুক্ত লোকসকলে যাতে তেওঁলোকৰ ৰোগ প্ৰতিৰোধ ক্ষমতা সঠিক ভাবে বৰ্তাই ৰাখিব পাৰে তাৰ বাবে তেনে লোকক নিয়মীয়াকৈ চৱনপ্ৰাশ খোৱাৰ পৰামৰ্শ দিয়া হৈছে।

হালধীয়ে যিহেতু ৰোগ প্ৰতিৰোধ ক্ষমতা বৃদ্ধি কৰে সেয়ে কোভিডৰ পৰা আৰোগ্য লাভ কৰা লোক সকলক স্বাস্থ্য দপ্তৰে নিয়মীয়াকৈ হালধী মিহলোৱা গাখীৰ খোৱাৰ পৰামৰ্শ দিছে।

স্বাস্থ্য বিভাগৰ নিৰ্দেশনাত থকা পৰামৰ্শ সমূহ এনেধৰণৰ—

• মাস্ক,ছেনিটাইজাৰ,সামাজিক দূৰত্ব বজাই ৰাখিব
• পৰ্যাপ্ত পৰিমাণৰ কুহুমীয়া গৰম পানী খাওঁক।
• AYUSH-নিৰ্দ্ধাৰণ কৰি দিয়া ৰোগ প্ৰতিৰোধ ক্ষমতা বৃদ্ধিকাৰী দৰৱ গ্ৰহণ কৰক।
• যদি শৰীৰে অনুমতি দিয়ে তেন্তে সাধাৰণ ঘৰুৱা কাম-কাজ কৰিব পাৰে।
• দৈনিক সাধাৰণ ব্যায়াম কৰক।
• নিতৌ যোগাসন,প্ৰাণায়াম আদি কৰক।
• চিকিৎসকৰ পৰামৰ্শ লৈ উশাহৰ ব্যায়াম কৰক।
• শৰীৰে সহ্য কৰিব পৰাকৈ দৈনিক পুৱা-গধুলি খোজকাঢ়ক।
• সহজে হজম হোৱা পুষ্টিকৰ খাদ্য গ্ৰহণ কৰক।
• টোপনি ক্ষতি নকৰিব।
• ধূমপান,সুৰাপান নকৰিব।
• সদায় নিজে দেহৰ তাপমাত্ৰা,চুগাৰ আদি পৰীক্ষা কৰক।
• যদি শুকান কাহ আদি থাকে তেন্তে নিমখ পানীৰে গাৰ্গল কৰক।কাহৰ দৰৱ চিকিৎসকৰ পৰামৰ্শ মতেহে খাব আদি।