এমাহৰ ভিতৰত ছটা আন্তঃৰাষ্ট্ৰীয় স্বৰ্ণ পোৱা হিমা বিশ্ব চেম্পিয়নশ্বিপৰ যোগ্যতা অৰ্জনত ব্যৰ্থ
জুলাই আৰু আগষ্ট মাহত একেৰাহে ছখন আন্তঃৰাষ্ট্ৰীয় ইভেণ্টত স্বৰ্ণ পদকৰে ইতিহাস ৰচা অসম কন্যা হিমা দাসে আগন্তুক বিশ্ব চেম্পিয়নশ্বিপৰ ৪০০ মিটাৰ দৌৰত অংশ নলয়।
কিয়নো কোনো এখন প্ৰতিযোগিতাতে বিশ্ব চেম্পিয়নশ্বিপৰ বাবে যোগ্যতা অৰ্জনকাৰী মাপ স্পৰ্শ কৰিবলৈ সক্ষম নহ’ল হিমা।
উল্লেখ্য যে বিশ্ব চেম্পিয়নশ্বিপৰ ৪০০ মিটাৰৰ যোগ্যতা নিৰ্ধাৰণকাৰী সময় হৈছে ৫১.৮০। কিন্তু হিমাৰ শেহতীয়া সময় হৈছে ৫২.০৯ ছেকেণ্ড।
বিশ্ব চেম্পিয়নশ্বিপৰ বাবে অন্তিম কোৱালিফায়িং টুৰ্ণামেণ্ট হ’ল ইণ্ডিয়ান গ্ৰা: পি:। এই প্ৰতিযোগিতাখন অনুষ্ঠিত হ’ব ৫ ছেপ্তেম্বৰত। কিন্তু হিমাই প্ৰতিযোগিতাখনত অংশ নোলোৱাৰ সিদ্ধান্ত লৈছে।
হিমাৰ এই সিদ্ধান্তৰ পাছতেই বিশ্ব চেম্পিয়নশ্বিপত পদক অৰ্জনেৰে দেশবাসীক পুনৰ গৌৰৱান্বিত কৰাৰ আশা পুহি ৰখা ক্ৰীড়া প্ৰেমীসকল নিৰাশ হোৱা পৰিলক্ষিত হৈছে।
লগতে পঢ়ক : ২০ দিনত পাঁচটাকৈ স্বৰ্ণ পদক অৰ্জন কৰাৰ পিছতো যোগ্যতা অৰ্জন কৰিব পৰা নাই হিমাই
ইফালে প্ৰতিযোগিতাখনত ৪x৪০০ মিটাৰ ৰীলে ৰেচত হিমাই অংশ ল’ব পাৰিব নে নোৱাৰে তাক লৈও সন্দেহ।
ইণ্টাৰনেশ্যনেল ফেডাৰেশ্যনে ১৬ ছেপ্তেম্বৰৰ পাছতহে ৪x৪০০ মিটাৰ ৰীলেৰ ৰেংকিং প্ৰকাশ কৰিব। আৰু প্ৰকাশিত ৰেংকিঙৰ শীৰ্ষ আঠত যদি ভাৰতীয় দলে স্থান পায়, তেন্তে বিশ্ব চেম্পিয়নশ্বিপৰ ৰীলে ৰেচত হিমাই অংশ ল’ব।
উল্লেখ্য যে যোৱা বছৰ জাকাৰ্টাত অনুষ্ঠিত হোৱা এছিয়ান গেইমছত ৫০.৭৯ ছেকেণ্ডেৰে ৰূপৰ পদক অৰ্জন কৰিছিল হিমাই। কিন্তু হিমাই সেই ধাৰাবাহিকতা অক্ষুন্ন ৰাখিব নোৱাৰাত ২৭ ছেপ্তেম্বৰৰ পৰা ৬ অক্টোবৰলৈ ডোহাত অনুষ্ঠিত হ’ব লগীয়া বিশ্ব চেম্পিয়নশ্বিপলৈ যোগ্যতা অৰ্জনত ব্যৰ্থ হয়।