২০২০ টকিঅ’ অলিম্পিকৰ ৰাষ্ট্ৰীয় শিবিৰলৈ আমন্ত্ৰিত ধিং এক্সপ্ৰেছ হিমা দাস
হিমা দাসৰ ফাইল ফটো
অনিশ্চয়তাৰ অন্তত ২০২০ চনৰ টকিঅ’ অলিম্পিকৰ ৰাষ্ট্ৰীয় শিবিৰলৈ আমন্ত্ৰিত হৈছে অসমৰ তাৰকা দৌৰবিদ হিমা দাস।
কঁকালৰ বিষৰ বাবে বিশ্ব এথলেটিকছৰ ভাৰতীয় দলৰ পৰা বাহিৰ হ’বলগীয়া হোৱা হিমা দাসৰ অলিম্পিকৰ প্ৰস্তুতিকলৈ যথেষ্ট অনিশ্চয়তাৰ সৃষ্টি হৈছিল।
২৭ ছেপ্টেম্বৰৰ পৰা ৬ অক্টোবৰলৈ ডোহাত অনুষ্ঠিত হোৱা আই এ এ এফ বিশ্ব চেম্পিয়নশ্বিপৰ মহিলাৰ ৪× ৪০০ মিটাৰ আৰু ৪× ৪০০ মিটাৰ মিক্সড ৰীলেৰ বাবে প্ৰথমতে হিমা দাসৰ নাম ভাৰতীয় দলত অন্তৰ্ভুক্ত কৰা হৈছিল যদিও পৰৱৰ্তী সময়ত আঘাতৰ গভীৰতাৰ কথা লক্ষ্য কৰিয়ে খেলুৱৈ গৰাকীৰ নাম ভাৰতীয় দলৰ পৰা বাদ দিয়া হয়।
বিশ্ব এথলেটিকছত আঘাতৰ বাবে অংশ ল’ব নোৱাৰা হিমাই আঘাতজনিত সমস্যাৰ পৰা উপশম লাভৰ বাবে বৰ্তমান জিৰণি গ্ৰহণ কৰি আছে।
উল্লেখযোগ্য যে, ২০২০ টকিঅ’ অলিম্পিকলৈ লক্ষ্য ৰাখি ভাৰতীয় এথলেটিকছ ফেডাৰেশ্যনে পাটিয়ালাত ৰাষ্ট্ৰীয় শিবিৰ আয়োজন কৰিছে।