ডোহা বিশ্ব চেম্পিয়নশ্বিপৰ ভাৰতীয় দলত নাম নাই ধিং এক্সপ্ৰেছৰ
বিশ্ব চেম্পিয়নশ্বিপত তাৰকা দৌৰবিদ হিমা দাসৰ অংশগ্ৰহণক লৈ গভীৰ অনিশ্চয়তাই দেখা দিছে।
ভাৰতীয় এথলেটিকছ ফেডাৰেচনে বিশ্ব চেম্পিয়নশ্বিপলৈ ঘোষণা কৰা ভাৰতীয় দলৰ প্ৰাৰম্ভিক তালিকাত হিমাৰ নাম নথকাত এতিয়া স্বাভাৱিকতে হিমাৰ অংশগ্ৰহণকলৈ প্ৰশ্নবোধকৰ সৃষ্টি হৈছে।
উল্লেখযোগ্য যে, ২৭ ছেপ্টেম্বৰৰ পৰা ৬ অক্টোবৰলৈ ডোহাত অনুষ্ঠিত হ’বলগীয়া আই এ এ এফ বিশ্ব চেম্পিয়নশ্বিপৰ মহিলাৰ ৪× ৪০০ মিটাৰ আৰু ৪× ৪০০ মিটাৰ মিক্সড ৰীলেৰ বাবে পূৰ্বে ৯ ছেপ্তেম্বৰত ঘোষিত ভাৰতীয় দলত হিমাৰ নাম অন্তৰ্ভূক্ত কৰা হৈছিল যদিও শুকুৰবাৰে আই এ এ এফক ভাৰতীয় এথলেটিকছ ফেডাৰেচনে দাখিল কৰা তালিকাত হিমাৰ নাম অন্তৰ্ভূক্ত কৰা নহ’ল।
জানিব পৰা মতে, হিমাৰ আঘাতজনিত সমস্যাক লৈ ভাৰতীয় এথলেটিকছ ফেডাৰেচনে ৰিস্ক ল’ব বিচৰা নায়।
ফেডাৰেচনৰ সভাপতিৰ প্ৰতিক্ৰিয়াৰ পৰা হিমাৰ আঘাতজনিত সমস্যাৰ বাবে তেওঁক ভবিষ্যৰ বাবেহে প্ৰস্তুত কৰাৰ প্ৰতি তেওঁলোক বেছি আগ্ৰহী যেন বোধ হয়।
ফেডাৰেচনৰ সভাপতিয়ে সংবাদ মাধ্যমৰ আগত হিমাৰ বৰ্তমান বয়স যথেষ্ট কম গতিকে তেওঁৰ ওপৰত অত্যাধিক চাপ দিয়াটো অনুচিত বুলি মন্তব্য কৰে।