নলবাৰীত প্ৰধানমন্ত্ৰী ৰাষ্ট্ৰীয় ডায়েলাইচিছ আঁচনি আনুষ্ঠানিকভাৱে মুকলি হিমন্ত বিশ্ব শৰ্মাৰ

বৃক্কজনিত ৰোগত আক্ৰান্ত লোকসকলৰ বিনামূলীয়া ডায়েলাইচিছ সেৱা প্ৰদানৰ অভিলাষী পৰিকল্পানাৰে আজিৰ পৰা অসমত মুকলি কৰা হয় প্ৰধানমন্ত্ৰী ৰাষ্ট্ৰীয় ডায়েলাইচিছ আঁচনি। এতিয়াৰে পৰা অসমৰ নিৰ্ধাৰিত চৰকাৰী চিকিৎসালয়সমূহত কোনোধৰণৰ অটল অমৃত কাৰ্ড অথবা আয়ু্ষ্মান ভাৰত কাৰ্ড নোহোৱাকৈ ধনী-দুখীয়া সকলো শ্ৰেণীৰ নাগৰিকে বিনামূলীয়াকৈ বৃক্কৰ ডায়েলাইচিছ কৰিব পাৰিব।

আজি অসমৰ স্বাস্থ্যমন্ত্ৰী হিমান্ত বিশ্ব শৰ্মাই নলবাৰীৰ শ্বহীদ মুকুন্দ কাকতি অসামৰিক চিকিৎসালয়ত আঁচনিখন আনুষ্ঠানিকভাবে শুভাৰম্ভ কৰে। আঁচনিখন শুভাৰম্ভ কৰাৰ সময়ত শৰ্মাক সংগ দিয়ে মঙলদৈ সমষ্টিৰ নৱনিৰ্বাচিত সাংসদ দিলীপ শইকীয়া আৰু নলবাৰী সমষ্টিৰ বিধায়ক অশোক শৰ্মাকে ধৰি শতাধিক গুণমুগ্ধ আৰু দলীয় নেতা-কৰ্মীয়ে।

প্ৰধানমন্ত্ৰী ৰাষ্ট্ৰীয় ডায়েলাইচিছ আঁচনিখন মুকলি কৰি হিমন্ত বিশ্ব শৰ্মাই আঁচনিখন শুভাৰম্ভ কৰিবলৈ পাই অতিশয় আনন্দিত হোৱা বুলি মন্তব্য কৰাৰ লগতে আঁচনিখনে ৰাজ্যৰ বৃক্ক ৰোগত আক্ৰান্তসকলক যথেষ্ট সকাহ দিবলৈ সক্ষম হ’ব বুলি আশা ব্যক্ত কৰে।

আনহাতে, নলবাৰীত আঁচনিখন শুভাৰম্ভ কৰি শৰ্মাই সংবাদমাধ্যমৰ আগত মৰিগাঁও অসামৰিক চিকিৎসালয়, মঙ্গলদৈ অসামৰিক চিকিৎসালয়, বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়, তেজপুৰ চিকিৎসা মহাবিদ্যালয়, শোণিতপুৰৰ কনকলতা অসামৰিক চিকিৎসালয়, বঙাইগাঁও অসামৰিক চিকিৎসালয় আৰু তিনিচুকীয়াৰ এল. জি. বি. অসামৰিক চিকিৎসালয়তো বিনামূলীয়া ডায়েলাইচিছ সেৱা অচিৰেই আৰম্ভ হ’ব বুলি মন্তব্য কৰে৷