লোকসভা নিৰ্বাচনলৈ সাজু টোগাড়িয়াৰ ‘হিন্দুস্থান নিৰ্মাণ দল’; ৩টা সমষ্টিৰ প্ৰাৰ্থী ঘোষণা; ১৪টাতে প্ৰাৰ্থী দি ভোট ফালিব বিজেপিৰ

নাগৰিকত্ব সংশোধনী বিধেয়কৰ জৰিয়তে স্বদেশী হ’ব লগীয়া হিন্দু বাংলাদেশীক অসমত সংস্থাপনৰ বিৰোধিতা কৰি এইবাৰ লোকসভা নিৰ্বাচনত অৱতীৰ্ণ হ’ব ৰাষ্ট্ৰীয় পৰ্য্যায়ৰ গোড়া হিন্দুত্ববাদী নেতা প্ৰবীণ ভাই টোগাড়িয়াৰ নেতৃত্বত নতুনকৈ গঠিত হোৱা দল ‘হিন্দুস্থান নিৰ্মাণ দল’।

অসমক বাদ কৰি দেশৰ অন্যান্য প্ৰান্ত, যেনে- গুজৰাট, মহাৰাষ্ট্ৰ, পাঞ্জাব, চুৰাট ইত্যাদি ঠাইত অসমৰ পৰাও হিন্দু বাংলাদেশীখিনিক নি সংস্থাপনৰ পোষকতা কৰিছে ‘হিন্দুস্থান নিৰ্মাণ’ দলে। এই কথা সদৰী কৰে দলটোৰ ৰাজ্যিক সভাপতি ৰাজীৱ কাকতীয়ে।

উল্লেখযোগ্য যে, কিছুদিন পূৰ্বে গুৱাহাটীত এখন জনসভাত অংশগ্ৰহণ কৰি দলটোৰ ৰাষ্ট্ৰীয় সভাপতি প্ৰবীণ ভাই টোগাড়িয়াই অসমৰ বাংলাদেশীক অন্য ৰাজ্যলৈ নি সংস্থাপিত কৰাৰ পোষকতা কৰিছিল।

ইপিনে, আজি গুৱাহাটীৰ শ্ৰীমন্তপুৰস্থিত দলটোৰ ৰাজ্যিক কাৰ্য্যালয়ত এখন সংবাদমেল সম্বোধন কৰি প্ৰথম পৰ্য্যায়ৰ এখন তালিকা প্ৰকাশ কৰে দলৰ নেতৃত্বই। প্ৰথম পৰ্য্যায়ৰ তালিকাত তিনিটা সমষ্টিৰ বাবে প্ৰাৰ্থী ঘোষণা কৰিছে দলটোৱে।

তালিকা অনুসৰি গুৱাহাটী লোকসভা সমষ্টিৰ পৰা দলৰ ৰাজ্যিক সভাপতি ৰাজীৱ কাকতীয়ে প্ৰতিদ্বন্দ্বিতা কৰিব। লগতে বৰপেটাৰ পৰা ভাস্কৰ কলিতা আৰু ডিব্ৰুগড় লোকসভা সমষ্টিৰ পৰা প্ৰতিদ্বন্দ্বিতা কৰিব অপূৰ্ব শইকীয়াই।

তদুপৰি, বাকী থকা সমষ্টিকেইটাৰ প্ৰাৰ্থীৰ নাম ২২ মাৰ্চৰ দিনা ঘোষণা কৰিব বুলি কাকতীয়ে জানিবলৈ দিয়ে।

আনহাতে, উক্ত সংবাদমেলতে সভাপতিগৰাকীয়ে কয়, ‘‘লোকসভা নিৰ্বাচনৰ আমাৰ মূল ইচ্ছ্যু হ’ব বাংলাদেশীমুক্ত অসম গঢ় দিয়া।‘’

ইয়াৰোপৰি, নিবনুৱা সমস্যা সমাধান, কৃষকৰ সমস্যা সমাধান আৰু বানপানী সমস্যাক ৰাষ্ট্ৰীয় সমস্যা হিচাপে ঘোষণা কৰি ইয়াৰ স্থায়ী সমাধান কৰাটোৱেও তেওঁলোকৰ এজেণ্ডাৰ ভিতৰত অন্তৰ্ভুক্ত হ’ব বুলি তেওঁ জানিবলৈ দিয়ে।

তেওঁ আৰু কয় ‘সত্ৰৰ মাটি বেদখলমুক্ত কৰাটো প্ৰধান দায়িত্ব আৰু কৰ্তব্য।‘

ইপিনে, আগন্তুক লোকসভা নিৰ্বাচনক কেন্দ্ৰ কৰি দলটোৱে কঁকালত টঙালি বান্ধিছে বুলি তেওঁ সংবাদমেলত দাবী কৰে।

‘’ইতিমধ্যে ৰাজ্যৰ গাঁৱে-ভূঞে আমাৰ কাৰ্য্যকৰ্তাসকল প্ৰচাৰৰ উদ্দেশ্যে সোমাই পৰিছে।‘’ কাকতীয়ে সংবাদমেলত কয়।

তদুপৰি, শাসকীয় দল বিজেপিক সমালোচনা কৰি তেওঁ সংবাদমেলত কয় যে বিজেপিৰ প্ৰতি জনসাধাৰণৰ আস্থা আৰু বিশ্বাস হেৰাই গৈছে। বৰ্তমান সময়ত বিজেপিৰ স্থিতি একেবাৰেই দুৰ্বল বুলিও তেওঁ কয়।

তেওঁ আৰু কয়, ‘’কংগ্ৰেছে যি ভ্ৰষ্টাচাৰ কৰি গৈছিল, সেই কংগ্ৰেছী নেতাখিনিক হাইজেক কৰি আনি ভাৰতীয় জনতা পাৰ্টী ভ্ৰষ্টাচাৰত লুতুৰি-পুতুৰি খাইছে।‘’

আনহাতে, ৰাজ্যৰ ৫খন ঠাইত প্ৰচাৰ চলাবলৈ দলটোৰ ৰাষ্ট্ৰীয় সভাপতি ডাঃ প্ৰবীণ ভাই টোগাড়িয়া অসমলৈ আহিব বুলি তেওঁ জানিবলৈ দিয়ে।