গোলাঘাটলৈ অসম বিধানসভাৰ সৰ্বদলীয় প্ৰতিনিধি দল; বুজ ল’ব সাম্প্ৰতিক পৰিস্থিতিৰ

বিষাক্ত সুৰাপান কৰি গোলাঘাট আৰু যোৰহাট জিলাত প্ৰায় ডেৰ শতাধিক লোকে প্ৰাণ হেৰুওৱা ঘটনাক কেন্দ্ৰ কৰি ৰাজ্যৰ সৰ্বত্ৰে তীব্ৰ প্ৰতিক্ৰিয়া অব্যাহত থকাৰ সময়তে আজি উক্ত ঘটনাৰ বুজ লোৱাৰ উদ্দেশ্যে গোলাঘাটলৈ গৈছে অসম বিধানসভাৰ উচ্চস্তৰীয় সৰ্বদলীয় প্ৰতিনিধিৰ এটা দল।

কিদৰে চুলাইৰ বিষক্ৰিয়াত জিলা দুখনৰ প্ৰায় ডেৰ শতাধিকৰো অধিক লোকে প্ৰাণ হেৰুৱালে তাৰ প্ৰকৃত কাৰণ জানিবলৈয়ে অসম বিধাসভাৰ অধ্যক্ষ হীতেন গোস্বামীৰ নেতৃত্বত আজি ২১জনীয়া দলটো জিলাখন উপস্থিত হৈছে।

জানিব পৰা মতে দলটোৱে প্ৰথমে গোলাঘাট কুশল কোঁৱৰ অসামৰিক চিকিৎসালয়ত উপস্থিত হৈ চুলাই বিষক্ৰিয়াত আক্ৰান্ত হৈ চিকিৎসাধীন হৈ থকা ৰোগীসকলক সাক্ষাৎ কৰিব। আৰু ইয়াৰ পাছতে মৃত্যু উপত্যকালৈ ৰূপান্তৰিত হোৱা গোলাঘাটৰ শালমৰা বাগিচাৰ সাম্প্ৰতিক পৰিৱেশ সম্পৰ্কে বুজ ল’ব।

বিধানসভাৰ অধ্যক্ষ হিতেন গোস্বামীৰ  নেতৃত্বত যোৱা সৰ্বদলীয় প্ৰতিনিধি দলটোত আছে বিধানসভাৰ বিৰোধী পক্ষৰ নেতা দেৱব্ৰত শইকীয়া, মন্ত্ৰী পীয়ূষ হাজৰিকা, মন্ত্ৰী পল্লৱলোচন দাস, বিধায়ক বৃন্দাবন গোস্বামী, ৰকিবুল হুছেইন, অজন্তা নেওগ, অতুল বৰা, আমিনুল ইছলাম, কমলসিং নাৰ্জাৰী, ৰমেন্দ্ৰ নাৰায়ণ কলিতা, ৰূপজ্যোতি কুৰ্মী, কমলাক্ষ দে’ পুৰকায়স্থ, নুৰুল হুদা, ভূপেন পেগু, তেৰছ গোৱালা, ৰ’জলীনা তিৰ্কী, সঞ্জয় কিষান, মৃণাল শইকীয়া, ঋতুপৰ্ণ বৰুৱা, বিমল বৰা আৰু দেৱানন্দ হাজৰিকা।