ভাৰতৰ হৈ লাভ কৰা প্ৰথম সুযোগতে উজলিল মণিপুৰৰ বাঁওহতীয়া চুইং মাষ্টাৰ ৰেক্স সিং

অভিষেক মেচতে উজলি উঠিল মণিপুৰৰ বাঁওহতীয়া চুইং মাষ্টাৰ ৰেক্স সিং। ৰেক্সৰ দুৰ্দান্ত বলিং প্ৰদৰ্শনৰ সুবাদত ভাৰতীয় ১৯ অনূৰ্ধ্বৰ ক্ৰিকেট দলটোৱে আলহী দল দক্ষিণ আফ্ৰিকাক দ্বিতীয়খন টেষ্ট মেচত ইনিংছ ব্যৱধানত পৰাস্ত কৰিবলৈ সক্ষম হয়।

ভাৰতে মেচখন এক ইনিংছ ১৫৮ ৰানত জয়ী হয়। মেচখনত প্ৰথমে বেট ধৰি দক্ষিণ আফ্ৰিকাই ১৫২ ৰান সংগ্ৰহ কৰে। ইয়াৰ প্ৰত্যুত্তৰত ভাৰতে প্ৰথম ইনিংছত সংগ্ৰহ কৰে ৩৯৫ ৰান।

২৪৩ ৰানত পিছ পৰি থকা দক্ষিণ আফ্ৰিকাই দ্বিতীয় ইনিংছ মুকলি কৰিব আহি ৰেক্স সিঙৰ চুইঙত তিষ্ঠিব নোৱাৰি মাত্ৰ ৮৫ ৰানতে ইনিংছ সামৰে। আৰু এইদৰে মেচখনত লজ্জাজনকভাৱে ইনিংছ ব্যৱধানত পৰাস্ত হয়।

মণিপুৰৰ প্ৰতিভাৱান বলাৰ গৰাকীয়ে দ্বিতীয় ইনিংছত ১৮ ৰানৰ বিনিময়ত চাৰিটা উইকেট লাভ কৰে। তিৰুৱন্তপুৰমৰ গ্ৰীণফিল্ড ইণ্টাৰনেশ্যনেল ষ্টেডিয়ামত অনুষ্ঠিত হোৱা মেচখন বৃহস্পতিবাৰে অন্ত পৰে।

উল্লেখ্য যে যোৱা বছৰৰ ডিচেম্বৰত অনুষ্ঠিত হোৱা ১৯ অনূৰ্ধ্ব কোচ বিহাৰ ট্ৰফীৰ এখন মেচত ৰেক্স সিঙে অৰুণাচলৰ বিৰুদ্ধে এটা ইনিংছত ১০টা উইকেট দখল কৰি ক্ৰিকেট জগতত চাঞ্চল্যৰ সৃষ্টি কৰিছিল। এই প্ৰদৰ্শনৰ বাবেই তেওঁ ভাৰতীয় অনূৰ্ধ্ব দলত নিৰ্বাচিত হয়।