জেইলৰ ভিতৰত এতিয়া কেনে আছে অখিল গগৈ?

যোৱা বৰ্ষৰ ডিচেম্বৰ মাহৰ পৰা বিগত প্ৰায় ২১০ দিন ধৰি কাৰাৰুদ্ধ হৈ থকা কৃষক নেতা অখিল গগৈ পুনৰ অসুস্থ বুলি যোৱা দুদিন ধৰি বাতৰি প্ৰচাৰ হৈ আহিছে।

প্ৰচাৰিত বাতৰি অনুসৰি কৃষক নেতাগৰাকী প্ৰচণ্ড জ্বৰ, কাঁহত আক্ৰান্ত হোৱাৰ লগতে দেখা দিছে মহামাৰী ক’ৰ’নাৰ প্ৰায়বোৰ লক্ষণ।

এই বাতৰি প্ৰকাশ পোৱাৰ পাছতে ৰাজ্যজুৰি বিভিন্ন সংগঠন তথা ব্যক্তিয়ে গগৈৰ উপযুক্ত স্বাস্থ্য পৰীক্ষা কৰাৰ লগতে বিনাচৰ্তে মুকলি কৰিব লাগে বুলি দাবী উত্থাপন কৰিছে।

তেনে সময়তে এই সন্দৰ্ভত বৰ্তমান অখিল গগৈ জেইলৰ ভিতৰত কেনে আছে জানিবলৈ নৰ্থ ইষ্ট নাওৰ সাংবাদিকে যোগাযোগ কৰিছিল জেইলৰ অধীক্ষক ৰঞ্জিত বৈশ্যৰ সৈতে।

“অখিল গগৈৰ বৰ্তমান অৱস্থা ঠিকেই আছে। তেওঁৰ ক’ৰ’ণা হৈছে বুলি চিকিৎসকেও নকয়। পেপাৰ-টিভিয়ে তেওঁৰ ক’ৰ’ণা লক্ষণ পোৱা বুলি কয়। এতিয়া তেওঁৰ কি হৈছে চিকিৎসকে জানিব। সময় মতে যিবোৰ স্বাস্থ্য পৰীক্ষা কৰাব লাগে কৰাই থকা হৈছে।” আমাৰ সাংবাদিকৰ আগত বৈশ্যই এইদৰে কয়।

ইপিনে, ক’ৰ’ণাৰ উপসৰ্গই দেখা দিয়াৰ পাছত উচ্চ ন্যায়ালয়ে কোভিড টেষ্ট কৰাবলৈ নিৰ্দেশনা দিছিল জেইল কতৃপক্ষক।

সেই নিৰ্দেশনা অনুসৰি আজি পুৱাৰ ভাগত কৃষক নেতাগৰাকীৰ স্বাৱ টেষ্ট কৰোৱা হ’ল বুলি বৈশ্যই আমাৰ সাংবাদিকৰ আগত কয়।

বৰ্তমানলৈকে টেষ্টৰ ৰিজাল্ট অহা নাই বুলি অধীক্ষকগৰাকীয়ে কয়।

জানিব পৰা মতে, বৰ্তমান গুৱাহাটী কেন্দ্ৰীয় কাৰাগাৰত ১০৮৯ গৰাকী কয়দী আছে।

উল্লেখযোগ্য যে, কিছুদিন পূৰ্বে কৃষক নেতা ধৈৰ্য কোঁৱৰে জেইলৰ ভিতৰত সামাজিক দূৰত্ব একেবাৰে মানি চলা নহয় বুলি সংবাদ মাধ্যমৰ আগত গুৰুতৰ অভিযোগ উত্থাপন কৰিছিল।

বৰ্তমানলৈকে দুগৰাকীকৈ অপৰাধীৰ দেহত কোভিড-১৯ পজিটিভ ধৰা পৰিছে আৰু দুবাৰকৈ কণ্টেইনমেণ্ট জ’ন হিচাপে ঘোষণা কৰা হৈছিল কাৰাগাৰখন।