মহানগৰীৰ মহা বিপদ! দৈনিক পাঁচ শতাধিককৈ আক্ৰান্ত ক’ৰ’নাত; কমি আহিছে চিকিৎসালয়ৰ বিচনা

মহানগৰীলৈ নামি আহিছে মহাবিপদ। যিমানেই ক’ভিড-১৯ ৰ টেষ্টৰ পৰিমাণ বাঢ়ি আহিছে সিমানেই বৃদ্ধি পাই আহিছে ক’ৰ’না আক্ৰান্ত ৰোগীৰ সংখ্যা।

যোৱা ৩-৪ দিনত দৈনিক অতি কমেও পাঁচ শতাধিককৈ লোক গণ সংক্ৰমণৰ বলি হৈ আক্ৰান্ত হৈছে ক’ৰ’নাত। যাৰ ফলত যোৱা ১৩ দিনত প্ৰায় ৪২০০ লোক আক্ৰান্ত হৈছে ক’ৰ’না ভাইৰাছত।

ৰাজ্যখনত নতুনকৈ আৰু ৮১৪ গৰাকী লোকৰ দেহত ধৰা পৰিছে কোভিড-১৯ পজিটিভ। ইয়াৰে ৫৮৮ গৰাকীয়েই মহানগৰী গুৱাহাটীৰ।

ৰাজ্যখনত বৰ্তমান ক’ভিড-১৯ত আক্ৰান্ত ৰোগীৰ মুঠ সংখ্যা হৈছে ১৩৩৩৬ গৰাকী।

বৰ্তমান সক্ৰিয় ৰোগীৰ সংখ্যা হৈছে ৪৯৮৮ গৰাকী।

ৰাজ্যখনত বৰ্তমানলৈ ৮৩২৯ গৰাকী আক্ৰান্ত ৰোগীয়ে আৰোগ্য লাভ কৰিছে।

সেইদৰে, অসমত এতিয়ালৈকে ক’ভিড-১৯ত আক্ৰান্ত হৈ ১৬ গৰাকী ৰোগীৰ মৃত্যু হৈছে।

মঙলবাৰে নিশা এটা টুইটৰ জৰিয়তে ৰাজ্যখনৰ স্বাস্থ্য মন্ত্ৰী ড০ হিমন্ত বিশ্ব শৰ্মাই এই কথা সদৰী কৰিছে।

সোমবাৰৰ দিনটোত মুঠ ৭৬৫ গৰাকী লোক কোভিড-১৯ পজিটিভ হিচাপে চিনাক্ত হৈছিল। ইয়াৰে গুৱাহাটীৰ ৫৮৮ গৰাকী আছিল।

দেওবাৰে গুৱাহাটীত মুঠ ৫৫২ গৰাকী লোক ক’ৰ’নাত আক্ৰান্ত হৈছিল।

ইয়াৰ উপৰি শনিবাৰৰ দিনটোত সৰ্বাধিক ১২০২ গৰাকী ৰাজ্যত আক্ৰান্ত হোৱাৰ লগতে মহানগৰ গুৱাহাটীত ৭৭৭ গৰাকী আক্ৰান্ত হৈছিল।

গুৱাহাটীত ভয়ংকৰ ৰূপত গণ সংক্ৰমণ হোৱাৰ ফলত যোৱা ১৫ জুনৰ পৰা এতিয়ালৈকে প্ৰায় ৫০০০ গৰাকী লোক ক’ৰ’নাত আক্ৰান্ত হৈছে।

এনেধৰণৰ গণ সংক্ৰমণ হোৱাৰ ফলত এটা কথা নিশ্চিত যে মুম্বাই আৰু দিল্লীৰ স্থান দখল কৰিবলৈ বেছি সময়ৰ প্ৰয়োজন নহ’ব মহানগৰ গুৱাহাটীক।

উল্লেখযোগ্য যে, গুৱাহাটী মহানগৰীত ভয়ংকৰ ৰূপত বৃদ্ধি পাইছে সামাজিক (গণ) সংক্ৰমণ। যাৰ পৰিপ্ৰেক্ষিতত যোৱা ২৯ জুনৰ পৰা ১৪ দিনৰ বাবে সমগ্ৰ কামৰূপ মেট্ৰোত দিয়া হৈছে লকডাউন।

ইয়াৰ উপৰি, ৰাজ্যৰ অন্য টাউন এলেকাত প্ৰত্যেক সপ্তাহৰ শনিবাৰ দেওবাৰে ঘোষণা কৰা হৈছে লকডাউন।

লগতে সমগ্ৰ ৰাজ্যত সন্ধিয়া ৭ বজাৰ পৰা পুৱা ৭ বজালৈকে জাৰি কৰা হৈছে সান্ধ্য আইন।