আৰক্ষীৰ ধাৰাবাহিক অভিযান; বোকাখাতত কাঠফলা মিলসহ চোৰাং কাঠ জব্দ
বোকাখাতত আৰক্ষীয়ে পুনৰ ২৮ ডিচেম্বৰত এক অভিযান চলাই বোকাখাতৰ গড়মুৰ বৰটিকা অঞ্চলৰ পৰা বৃহৎ পৰিমাণৰ চোৰাং কাঠৰ লগতে এটা অবৈধ চোৰাং কাঠ ফলা মিলো জব্দ কৰে।
বোকাখাত আৰক্ষী থানাৰ ভাৰপ্ৰাপ্ত আৰক্ষী বিষয়া দিব্যজ্যোতি দত্তই বৰটিকাৰ মোহন দাস ওৰফে বৰ্মনৰ বাসগৃহৰ লগতে জোন বাউৰী, মোহন ওৰাং আৰু দিলীপ মুৰমুৰ নামৰ লোককেইজনৰ বাসগৃহৰ চৌহদৰ পৰা বৃহৎ পৰিমাণৰ চোৰাং কাঠ জব্দ কৰে। এই জব্দ কৰা কাঠ সমূহ মোহন দাস ওৰফে বৰ্মনৰ বুলি জনায় স্থানীয় লোকে।
নিজৰ বাসগৃহৰ উপৰিও উল্লিখিত লোক কেইজনৰ বাসগৃহৰ চৌহদতো মোহন দাসে চোৰাং কাঠ সমুহ লুকুৱাই থোৱা বুলি আৰক্ষীয়ে জনায়। চোৰাং কাঠৰ উপৰিও মোহন দাসৰ বাৰীতে গোপনে স্থাপন কৰা এটা কাঠ ফলা মিলো জব্দ কৰে আৰক্ষীয়ে।
উল্লেখযোগ্য যে মোহন দাস ওৰফে বৰ্মন নামৰ লোকজন বৰটিকা অঞ্চলৰ গাওঁৰক্ষী সংগঠনৰ সম্পাদক। অবৈধ কাঠ ফলা মিলটো লখৌজানৰে দ্ৰোন কলিতাই স্থাপন কৰা বুলি আৰক্ষী সূত্ৰে জানিব পৰা গৈছে।
ইফালে মিলটোৰ বাবে বন বিভাগক আবেদন জনোৱা বুলিও দ্ৰোন কলিতাই জনায় যদিও এই প্ৰসংগত কাজিৰঙা ৰাষ্ট্ৰীয় উদ্যানৰ সঞ্চালক পেৰিয়াৰস্বামী শিৱকুমাৰে তেনে কোনো আবেদন গ্ৰাহ্য নহয় বুলি কৈ কাঠ মিলতো জব্দ কৰি আনিবৰ বাবে বন কৰ্মীক নিৰ্দেশ দিয়ে।
পাছত আৰক্ষী বিষয়াই জব্দ কৰা কাঠ আৰু অবৈধ কাঠ ফলা মিলটো পূব অসম বন্যপ্ৰাণী সংমণ্ডলৰ খণ্ড বন বিষয়াৰ হাতত অৰ্পণ কৰে।