প্ৰতিবাদকাৰী ‘নাবালকক’ গুলিয়াই হত্যা; মানব অধিকাৰ আয়োগৰ কাষ চাপিব দিব্যজ্যোতি শইকীয়া

প্ৰতিবাদকাৰী ‘নাবালকক’ গুলিয়াই হত্যা কৰাৰ বিৰুদ্ধে শীঘ্ৰেই মানব অধিকাৰ আয়োগৰ কাষ চাপিব মানব অধিকাৰ কৰ্মী দিব্যজ্যোতি শইকীয়াই।

ইতিমধ্যে বৰাই আয়োগৰ কাষ চপাৰ বাবে প্রস্তুতি চলাই আছে বুলি নৰ্থ ইষ্ট নাওৰ সাংবাদিকৰে সৈতে হোৱা কথা-বতৰাত জানিবলৈ দিয়ে।

শইকীয়াৰ মতে মহানগৰীৰ হাতীগাওঁৰ চেম ষ্টেফৰ্ডক আৰক্ষীয়ে গুলিয়াই হত্যা কৰাটো একপ্ৰকাৰৰ মানৱাধিকাৰ উলংঘন।

‘’কাৰফিউত ফায়াৰিং কৰিব পাৰে। কিন্তু ল’ৰাটো খুব কম বয়সৰ, ১৬ বছৰত ভৰি দিছিল। ৰাস্তাত আহি থাকোতে গুলি চালনা কৰিছে, সাধাৰণতে শূণ্যলৈ গুলিচালনা কৰিও আৰক্ষীয়ে পৰিস্থিতি নিয়ন্ত্ৰণ কৰিব পাৰিলেহেঁতেন। কিন্তু ছাত্ৰজনৰ পেটত গুলি লাগিছে, ডিঙিৰে গুলি সোমাই মূৰেদি ওলাই গৈছে এইটো এটা মানৱাধিকাৰ উলংঘন কৰা কাৰ্য্য। এইধৰণৰ কামে সমস্যা কেতিয়াও সমাধান নকৰে। গতিকে এজন মানৱ অধিকাৰ কৰ্মী হিচাপে যাৱতীয়খিনি কৰিম,’’- আমাৰ সাংবাদিকৰ আগত এইদৰে কয় শইকীয়াই।

তাৎপয্যপূৰ্ণভাৱে চৰকাৰী পক্ষই এনেধৰণৰ পৰিস্থিতিৰ সৃষ্টি কৰা বুলি সন্দেহ প্ৰকাশ কৰি শইকীয়াই কয়,‘’কাৰফিউ দিবলগীয়া পৰিস্থিতি চৰকাৰে নিজে সৃষ্টি কৰা বুলি বিভিন্ন সুত্ৰৰ পৰা গম পাইছো। ৰাস্তাইদি গৈ থকা অৱস্থাত কমবয়সীয়া অৰ্থাৎ নাৱালকক গুলিয়াই হত্যা কৰাটো আইন উলংঘন হৈছে। গতিকে এগৰাকী মানৱাধিকাৰ কৰ্মী হিচাপে মানৱ অধিকাৰ আয়োগ বা বিভিন্ন আন্তঃৰাষ্ট্ৰীয় সংস্থাক আপত্তি দৰ্শাই আবেদন কৰিম।‘’

ইপিনে, নাগৰিকত্ব আইন সংশোধন কৰি চৰকাৰে মানৱ অধিকাৰ সুৰক্ষাৰ নামত উলংঘন কৰা বুলিহে দাবী কৰে শইকীয়াই।

শইকীয়াই কয়, ‘’কোনো দেশ বা ৰাজ্যৰ নাগৰিক বিপদত পৰিলে সেই নাগৰিকক মানৱতাৰ খাতিৰত সুৰক্ষা দিব পাৰে। কিন্তু যিখন নাগৰিকত্ব(সংশোধন) আইন হৈছে সেইখনত ধৰ্মৰ কথা উল্লেখ আছে। ধৰ্মৰ ওপৰত ভিত্তি কৰি হোৱা বাবে মানৱ অধিকাৰত ই নপৰিল।‘’

তেওঁ কয়,’’মানৱাধিকাৰ সাব্যস্ত কৰিবলৈ যাওঁতে ইয়াত মানৱ অধিকাৰ উলংঘনহে কৰা হ’ল। কিয়নো ইয়াত মূছলমান মানুহ অন্তৰ্ভুক্ত হোৱা নাই বা অন্য কিছুমান ধৰ্মও অন্তৰ্ভুক্ত হোৱা নাই। ই সম্পূৰ্ণ একপক্ষীয় হৈছে, গতিকে ই সাধাৰণতে আইন উলংঘন কৰিছে।‘’